Ал Шаҳрони муваффақиятли операция қилинди
25 ноя 2022 12:35
Янгиликлар

Ал Шаҳрони муваффақиятли операция қилинди

Теглар : Аргентина Ёсир Ал Шаҳрони Саудия Арабистони

Саудия Арабистони терма жамоаси ҳимоячиси Ёсир Ал Шаҳрони Аргентинага қарши ғалабали ўйинда ўз дарвозабони билан даҳшатли тарзда тўқнашиб кетганди.

Саудия Арабистони дарвозабони Муҳаммад Ал Овайс "Лусаил" стадионида кечган ўйин вақтида тўсатдан ҳимоячи Ёсир Ал Шаҳронига тиззаси билан зарба берди.

Мамлакати шарафини 73 та ўйинда ҳимоя қилган "Ал Ҳилол" футболчиси майдондан оғир аҳволда олиб чиқиб кетилди, кейинроқ операция учун Ар-Риёдга учиб кетди.

Саудия Арабистони термаси матбуот хизмати пайшанба куни ўзининг расмий Twitter саҳифасида операция муваффақиятли ўтганини тасдиқлади.

"Кеча Ёсир Ал Шаҳрони Ар-Риёддаги Қирол Абдулазиз тиббий шаҳарчасида жойлашган Миллий гвардия госпиталида ошқозон ости бези операциясини муваффақиятли ўтказди.
У миллий терма жамоа тиббий штабининг тўлиқ назорати остида. Саудия Арабистони футболи оиласи Ёсирнинг тезроқ тузалиб кетишини тилайди", – дейилади хабарда.

Саудия Арабистони 1990 йилги Камерундан кейин Жаҳон чемпионатида Аргентинани мағлуб этган (2:1) илк европалик бўлмаган жамоа бўлди.

Жаҳон чемпионатида Аргентинани мағлуб этган сўнгги учта жамоа мусобақада ғолиб бўлган (2014 йилда Германия ва 2018 йилда Франция) ёки финалга чиққан (2018 йилда Хорватия).

Эрве Ренар жамоаси "C" гуруҳида пешқадамлик қилмоқда ва шанба куни Польша билан куч синашади.

Ҳавола :

Манба : saff.com.sa

Янгиликларни Телеграмда ўқинг!

Рейтинг: +10