АГМК футболчилари Олмалиқ шаҳридаги 80-сонли ихтисослаштирилган мактаб интернати меҳмони бўлди ФОТОГАЛЕРЕЯ

Тадбирда “Олмалиқ КМК” АЖ раҳбарияти, касаба уюшмаси кенгаши, шаҳар Ёшлар иттифоқи ва “Олмалиқ КМК” АЖ Ёшлар иттифоқининг фаоллари ҳамда АГМК футбол клубининг бир гуруҳ чарм тўп усталари иштирок этишди. Тадбирни “Олмалиқ КМК” АЖ бошқарув раисининг ижтимоий масалалар бўйича ўринбосари Улуғбек Фаязов, бошқарув раисининг ходимлар бўйича ўринбосари Азим Мирзаджановлар очиб беришди. Улар ўз нутқида мамлакатимизда ногиронлиги бўлган шахсларга жамиятнинг тенг ҳуқуқли вакили сифатида муносабат билан ёндашилаётганини, бунинг натижасида Параолимпиада мусобақалари, халқаро тадбирларда ногиронлар оламшумул натижаларни қўлга киритиб келаётганини мамнуният билан билдирдилар.

80-сонли мактаб ўқувчиларидан иборат мини футбол жамоаси 2018-йилги биринчиликда Ўзбекистон чемпионлигини қўлга киритди. АГМК профессионал клуби футболчилари ҳамда комбинат раҳбарияти томонидан ғолиб ўқувчиларга чемпионлик медаллари ва фахрий ёрлиқлар топширилди. “Металлург” маданият саройи ижодий жамоалари томонидан тақдим этилган ранго-ранг концерт дастури ҳам тадбирга ўзгача файз киритди.

АГМК футбол клуби матбуот котиби Бахтиёр Ширинов, жамоа ҳимоячиси Владислав Касминин ва ярим ҳимоячиси Зохир Пиримовлар ўқувчилар томонидан берилган саволларга жавоб бериб ўтишди. Мактаб интернати спорт базасини мустаҳкамлаш юзасидан билдирилган таклифлар тадбир меҳмонлари томонидан маъқулланди.

Мактаб интернатининг мўъжаз спорт залида “АГМК” ва Ўзбекистон чемпиони 80-мактаб ўқувчилари ўртасида мини футбол бўйича учрашув ўтказилди. Қизғин ўтган беллашувда ихтисослаштирилган мактаб интернати жамоаси ғалаба қозонди. Учрашув сўнгида тадбир меҳмонлари томонидан ўқувчи ёшларга спорт анжомлари туҳфа этилди.