Адел Абдулраҳмон: "Ал Шабаб" эртага клуб ва Саудия Арабистони шаъни учун ўйнайди"

Унга футболчи Мажид Ал Маршади ҳамроҳлик қилди.

"ОЧЛда кейинги босқичга чиқиш учун имкониятимиз қолмаган. Бироқ клуб обрўси учун ўйнаймиз. Эртага жамоа Саудия Арабистони шарафини ҳимоя қилиш учун ҳам ўйнайди. Умид қиламанки, эртага клубларимиз яхшироқ ўйнайди. "Пахтакор" эртага ғалаба учун ўйнайди. Биз бунга йўл қўймаслигимиз керак", - дейди Адел Абдулраҳмон.

"Мураббийнинг фикрига қўшиламан. Эртага клуб ва Саудия Арабистони шаъни учун ўйнаймиз. Биринчи бор "Ал Шабаб" гуруҳдан чиқа олмади. Кейинги йил бундай бўлмаслигига уринамиз", - дейди Ал Маршади.

- Гуруҳдаги учала клубга қарши ўйнадинглар. Қайси клуб кучлироқ, кескинроқ ўйнар экан?
- Гуруҳдаги барча клублар тенг кучли. Барча жамоалар футбол ўйнашни билади. Алоҳида ажралиб турадиган клубни кўрмаяпман.

- Қайси жамоага қарши ўйнаш сиз учун қийин кечди?
Ал Маршади: - Мураббийнинг фикрига қўшиламан. Барча клубларнинг кучи тенг. "Ал Айн" бирозгина кучлироқ бўлиши мумкин.

- "Ал Шабаб" Тошкентга барча легионерларини олиб келдими?
- Наиф Ҳазази, Рафинья, Абдулазиз Биши, Волид Абдулла каби асосий футболчилар жароҳатлар туфайли Тошкентга кела олишмаган. 

- Жамоа охирги 7та ўйинда атига 2та ғалабага эришди. Бундай кучли клубга нима бўлди?
- Бу йилги мағлубиятларнинг асосий сабаби 7дан ортиқ асосий таркиб футболчиларимизнинг жароҳатлари бўлди. Улар фақат клубнинг эмас Саудия Арабистони терма жамоасининг асосий футболчилари ҳисобланишади. Шу боис ҳам ўйинимизда пасайиш кузатилди.

- Саудия Арабистонидаги баҳсда 2:2 ҳисоби қайд этилганди. Эртанги ўйинга қандайдир ўзгаришлар қилдингизми?
- Эртага "Пахтакор"га ғалаба керак. Бизда эса бу борада муаммо бўлмайди. Рақибда босим бўлади. "Пахтакор"нинг ягона устунлиги - ўз мухлислари қаршисида ўйнаши. Биз ҳужумда тезкор ва кескин ўйнашга уринамиз.


Нарзулла Сайдуллаев