Абдурауф Бўриев Шотландия клубига ўтиши мумкин эди, бироқ...

Шотландиянинг "Ливингстон" клуби Бўриевга қизиқиб қолган ва уни ўз сафида кўрмоқчи эди. Бироқ футболчи ишчи визасини олишда муаммога дуч келди. Бу ҳақда Нарзулла Сайдуллаев хабар берди. Гап шундаки, Шотландия олий лигасида ўйнаш учун футболчи ўз миллий терма жамоаси сафида камида 2 та тўлиқ ўйин ўтказиши керак.

Бўриев ҳозирга қадар Ўзбекистон МТЖ сафида 3 та баҳсда захирадан майдонга тушди холос.

"Ливингстон" клуби 1943 йилда ташкил топган ва уй ўйинларини 9713 томошабинга мўлжалланган "Алмондвейл" стадионида ўтказиб келади. Айни пайтда жамоани шотландиялик Дэвид Мартиндейл бошқармоқда.

Клуб ўтган мавсум Шотландия иккинчи дивизионида иштирок этди ва плей-офф орқали олий дивизионга чиқди.