Абдуқодир Ҳусанов "Ланс" футболчиларига тегишли бўлмаган қайси рақамларни ўзи истаса ҳам қўлга кирита олмайди?

Ўзбекистон миллий ва ёшлар терма жамоаси ҳимоячиси Абдуқодир Ҳусанов тез орада Франциянинг амалдаги вице-чемпиони — "Ланс" клуби таркибига бориб қўшилиши кутилмоқда. Албатта, ҳамюртимизнинг трансфери билан боғлиқ хабарлар футболга иштиёқманд кишиларни бефарқ қолдирмаслиги табиий. Шу билан бирга, унинг бўлажак клуби сафида қайси рақам остида тўп тепиши ҳам қизиқ. Тўғри, Абдуқодир бошқа футболчиларга тегишли бўлмаган рақамларни танлаш ҳуқуқига эга, аммо бўш бўлган баъзи рақамларга ўзи истаса ҳам эга қила олмайди. Хўш, бу қайси рақамлар?

12

Ушбу рақам клуб мухлислари шарафига ҳеч кимга берилмайди. Бу рақам "12-ўйинчи" сифатида рамзий маънога эга, шу боис, жамоага содиқ ва уларни ҳамиша қўллаб-қувватловчи ишқибозлар шарафига рақам "музлатилган".

17

"Ланс"да беш мавсум ҳаракат қилган Марк-Вивьен Фоэ 2003 йилги Конфедерациялар кубогида Камерун терма жамоасининг бир бўлаги эди. Шу йилнинг 26 июнь санасида Камерун мусобақанинг гуруҳ босқичида Колумбия билан тўқнаш келди. Учрашувнинг 72-дақиқасида Фоэ майдон марказида ҳушидан кетиб, касалхонада вафот этди. Шифохона маъмурлари Фоэнинг "кардиомиопатия гипертрофияси" деб аталадиган ва камдан-кам учрайдиган юрак хасталигига чалинганини аниқлади.

28 ёшли футболчининг ўйин ўртасида тўсатдан вафот этиши бутун футбол оламини ларзага солди. Франциялик юлдуз Тьерри Анри Миср дарвозасига гол урганидан сўнг осмонга ишора қилиб, ўз голини марҳумга бағишлади.

Ўлими арафасида Фоэ "Лион"дан ижара асосида "Манчестер Сити"га ўтганди. Шу боис, "Лион" ва "Манчестер Сити" у ўйнаган 23-рақамли либосни абадийлаштирди. Кейинроқ Камерун терма жамоаси аъзоси Жан Макун "Лион" сафида дўстини хотирлаш мақсадида Фоэнинг рақамида ҳаракат қилди. "Ланс" ҳам бир вақтлар ярим ҳимоячи кийган 17-рақамни бошқага бермасликка қарор қилди.

Яна қайси рақамлар танланиши мумкин?

Клубда 2, 6, 8, 11 дан ташқари ва 30 дан юқори кўпгина рақам бўш. Ўйлашимча, агар бошқа танлови бўлмаса, позициясидан келиб чиққан ҳолда Абдуқодир учун 2-рақам ҳам ёмон эмас.

Оқил Абдубарноев тайёрлади.