Абдуқаҳҳор Хожиакбаров: "Олмалиқ"нинг Туркиядаги йиғини анча сермаҳсул ўтди"

- Анталиядаги йиғиндаги шароитлар, ўртоқлик ўйинлари ҳақида фикрларингизни билдирсангиз.
- 12 январдан Туркиянинг Анталия шаҳрида дастлабки хорижий йиғинни ўтказдик. У ердаги шароитлар ажойиб эди. Машғулот майдонлари ва стадионларнику айтмаса ҳам бўлади, шунчаки супер.

Амалий ва назарий машғулотлар билан бирга ўртоқлик учрашувлари ҳам ўтказилди. Дастлаб Қозоғистоннинг "Акжайик" клуби билан ўйнадик. Қизиқарли кечган учрашувда жамоамиз 3:0 ҳисобида ғалаба қозонди.

Иккинчи баҳс Россиянинг "Сибирь" клубига қарши ўтказилди. Бу сафар ҳам рақиб дарвозасига жавобсиз 3та гол урдик.

Йиғинни эса Украинанинг "Карпати" клубига қарши ўйин билан тугатдик. Бу учрашувда 1:3 ҳисобида имконият бой берилди. Аммо мавсумолди ўртоқлик ўйинларида натижа биринчи ўринда бўлмайди. Асосийси футболчиларнинг жисмоний ҳолатини ўсиб бориши ва мавсумга яхши формада кириб бориш. Мураббийлар ҳар бир ўйиндан кейин камчиликларимизни кўрсатиб беришди, йигитлар керакли хулосаларни чиқаришди. Умуман олганда "Олмалиқ"нинг Туркиядаги йиғини анча сермаҳсул ўтди дея оламан.

- Виктор Кумиковнинг ғояларини футболчилар тушуниб боришаяптими?
- Албатта, янги мураббий келгач тактика ҳам ўзгаради. Кумиков ўз фикрлари, ғояларини футболчиларга сингдиришга уринмоқда. Йиғинлар бунда катта фойда бермоқда. Назарий машғулотларда ҳам кўп янгиликлар бўлмоқда.

- Кейинги режалар қандай?
- 26 январь куни Тошкентга қайтиб келдик. Энди 30 январда яна хорижий йиғинни ўтказиш учун Анталия шаҳрига учиб кетамиз. У ерда мавсумга тайёргарликнинг финал босқичи олиб борилади.

Нарзулла Сайдуллаев