Абдулатиф Абдуқодиров: “Биринчи лиганинг энг яхши ҳужумчиси бўлишимни кутмагандим”

- “championat.asia” сайтининг доимий ўқувчисиман. Ҳар куни ушбу сайтга кириб, футболимиздаги янгиликлар билан танишиб боришга ҳаракат қиламан. Биринчи лиганинг “Энг яхши ҳужумчиси” номинациясида ғолиб чиққанимни кўриб, аввалига хайрон бўлдим. Чунки буни кутмагандим. Албатта бундай эътибор ҳар қандай футболчига руҳан далда бўлади. Ўқиб хурсанд бўлдим. Сайт ижодкорларига каттакон раҳмат - дея гап бошлади Абдуқодиров.

- Ушбу номинацияда ғолиб чиқишингизга сабаб биринчи босқичда “НБУ-Осиё”даги ўйинларингиз ва жамоа сафида киритган голларингиздир. Бу клуб сизга трамплин вазифасини ўтаб берди. Фикримизга кўшиласизми?
- Чиндан ҳам “НБУ-Осиё”да ўйнаб, у ерда ўзимни кўрсатиб, олий лига жамоасининг эътиборига тушдим. “Банкирлар” сафида 2,5 йилдан буён ўйнаб келаётгандим. Бу йил биринчи босқичда 21та тўп киритдим. Табиийки бунга ўз мехнатларим эвазига эришдим. Қолаверса жамоадошларимнинг қўллаб-қувватлаши натижасида голлар урдим.

- “НБУ-Осиё”да ўтказган фаолиятингиз тўғрисида нима дейсиз?
- Жароҳат сабабли деярли ярим йил майдон ташқарисида қолиб кетдим. Табиийки спорт формам ҳам яхши эмасди. Бундай пайтда олий лига жамоаларининг эътиборига тушиш қийин. Шунда ҳеч ўйланиб ўтирмасдан, Илҳом Мўминжонов таклифини қабул қилиб, “банкирлар” сафига келиб қўшилганман. Илҳом ака билан олдин “Локомотив”да бирга ўйнаганимиз учун муносабатларимиз яхши. Шу инсон менинг аввалги холатимга қайтиш учун ёрдамини аямади.

Кейинчалик бошқарув постига Мухтор Қурбонов келди. Бу мураббий билан ҳам яхши ишладик. Албатта илиқ хотиралар қолган деб бемалол айта оламан. Гарчи ўз олдига элитага чиқиш вазифасини қўймасада, биринчи лиганинг доимий иштирокчиларидан бири саналади. Фақат моддий жиҳатдан унчалик мақтана олмайди холос. Бу жамоанинг келгуси фаолиятига омад тилайман.  


Исломбек Рустамбеков суҳбатлашди.