6та ўйин, 1 дуранг ва 5 мағлубият. Қосимов АГМК бошқарувида ҳали Арвеладзени мағлуб эта олмаган

Бу йил ҳам нафақат ўтган йил, балки 2018 йил мавсумдаги каби Ўзбекистон Кубоги финалида АГМК ва "Пахтакор" ўзаро баҳс олиб боради. Ўтган йил "Локомотив" стадионида кечган баҳсда АГМК 0:3 ҳисобида мағлуб бўлганди. 

Ундан олдинги йил Фарғонада бўлиб ўтган Кубок финалида АГМК 3:1 ҳисобида зафар қучиб ўз тарихида илк бор Кубокни қўлга киритган. Лекин, у пайт жамоа бош мураббийи Бахтиёр Ашурматов эди. 

2019 йилдан АГМК бошқаруви Миржалол Қосимов қўлига ўтди. Ўтган йил олмалиқликлар Қосимов қўл остида "Пахтакор"га қарши 4 марта расмий ўйинда майдонга тушиб, барчасида мағлуб бўлишди. Суперлигада 0:3 ва 1:4, Кубок финалида 0:3, Лига Кубоги финалида 2:6. 

Бу йил ҳисобидан жамоалар Суперлигада ўзаро курашиб, "Пахтакор" стадионида кечган баҳсда 2:2 қайд этилди. АГМК майдонида бўлиб ўтган иккинчи давра учрашувида "Пахтакор" рақибини 6:0 ҳисобида мағлуб этди. 

Кўриниб турибдики, Миржалол Қосимов АГМК бош мураббийлигини қўлга олганидан бери Шота Арвеладзе бошчилигидаги "Пахтакор"га қарши шу пайтгача 6 бор жамоани майдонга олиб тушган. Шундан биттасида дуранг ва 5 марта мағлубият қайд этилган. Тўплар нисбати: 6-24.

Шу ўринда мухлисларни қизиқтираётган савол: Қосимов АГМК бош мураббийи этиб тайинланганидан бери илк бор грузиялик мураббийни мағлуб этадими ёки Арвеледзе "Пахтакор" билан иккинчи бор Ўзбекистон Кубогини қўлга киритадими? Буни албатта эртанги финал якунида билиб оламиз.