Зайниддин Тожиев: “Ғазалкент” бутун эътиборни ёшларга қаратади, Про лигада 6 та жамоа жуда камлик қилди"

Қисқа вақт ичида шаклланганига қарамасдан, клуб раҳбарияти ва мураббийлар штаби олдига аниқ мақсадлар қўйган: рақобатбардош жамоа яратиш ҳамда барқарор тизимни йўлга қўйиш.

Жамоада асосий эътибор ёш футболчиларга қаратилган. “Ғазалкент” лойиҳаси орқали истеъдодли ёшларга катта футбол муҳитини ҳис этиш, профессионал даражада ўсиш ва келажакда кучли жамоалар учун ишончли трамплин бўлиш имкониятини яратиш кўзда тутилган.

Айни пайтда жамоа жисмоний ва тактик тайёргарликни уйғунлаштирган ҳолда машғулотлар олиб бормоқда. Биз бу борада жамоа бош мураббийи Зайниддин Тожиев билан суҳбатлашдик.

— Янги жамоа ташкил этилиши ҳақида тўхталиб ўтсангиз. Қишки ўқув-машғулот йиғинлари қандай ўтмоқда?

— “Ғазалкент” ёшлардан иборат жамоа бўлади. Бутун эътиборни ёш футболчиларга қаратамиз. Таркибимизда 2008–2009 йилларда туғилган футболчилар ҳам бор. Про лигада иштирок этишдан мақсад — рақобатни кучайтириш. Ёшларни ривожлантиришда энг муҳим омил — рақобат. Асосий мақсадимиз ҳар бир ёш тоифасидаги терма жамоаларга футболчилар етказиб бериш.

— Дарҳол Про лигада иштирок этиш таваккалчилик эмасми?

— Ўтган йили “Олимпик” жамоасида ҳам фаолият олиб борганман. Шуни кўрдимки, Про лига билан Биринчи лига ўртасида катта фарқ йўқ. Про лигада рақобат бироз кучлироқ. Биринчи лигада рақобатнинг етарли эмаслиги ёшларнинг ўсишига салбий таъсир кўрсатиши мумкин. Тайёргарлик жараёни юқори даражада кетяпти, чемпионат бошлангач барчаси майдонда намоён бўлади.

— Бугунги авлод футболчиларининг устун жиҳати нимада?

— Менталитетимиздан келиб чиқиб, кўпроқ техник футбол намоён этамиз. Бу — асосий устунлигимиз. Жисмоний сифатларни эса режали иш орқали шакллантириш мумкин.

— “Ғазалкент” жамоаси Туркияда йиғин ўтказади…

— 4 февралдан 4 мартгача Туркияда ўқув-машғулот йиғини ўтказамиз. Бир циклдан сўнг меҳмонхонани алмаштирамиз, чунки футболчилар зерикиб қолмаслиги керак. Бир ой давомида ўша ерда тайёргарлик кўришни режалаштирганмиз. Назорат учрашувларида юқори савиядаги жамоаларга қарши ўйнаймиз, бу эса футболчиларнинг ўсишига катта туртки беради.

— Ўтган мавсум Про лигада 6 та жамоа қатнашди. Илгари қуйи лигаларда 18–20 та жамоа ўйнаган. Мутахассис сифатида бунга муносабатингиз қандай?

— 6 та жамоа жуда кам. Учта жамоа Суперлига учун кураш олиб борди, қолганлари эса асосан очко улашиш билан чекланди. Янги мавсумда катта ўзгаришлар бўлиши, Про лигада 14 та жамоа иштирок этиши кутиляпти.