“Ёзёвон-Лочинлари” иккинчи даврага қай тарзда тайёргарлик кўрмоқда?

Жамоа бош мураббийи Исломбек Исмоиловнинг маълум қилишича, ёзёвонликлар куни-кеча Наманганда қисқа муддатли йиғин ўтказиб қайтган. Тоғли ҳудудда кечган ушбу йиғинда жисмоний тайёргарликка эътибор қаратилиб, шу билан бирга иккита назорат учрашувини ҳам ўтказиб қайтган. Аввалига “Навбаҳор” ёшларига қарши баҳс олиб бориб, 2:1 ҳисобида ғалаба қозонган бўлса, сўнгра Ҳаққулободнинг “Норин” жамоасини 2:0 ҳисобида таслим этган.

Таркибда ҳам эътиборга молик ўзгаришлар юз бермоқда. Бунгача жамоа шарафини ҳимоя қилиб келган Жаҳонгир Юсуфжонов, Ҳабибулло Буватоев, Ғиёс Турсунов, Ислом Ҳошимов, Давлатбек Ёрбеков ҳамда Владлен Норов эндиги фаолиятини бошқа клубда давом эттирадиган бўлди.

Таркибга янги келиб қўшилганлар эса “Цементчи”дан Дилшод Эминов ва Алишер Файзуллаев. “Олмалиқ” (ёшлар)дан Абдулазиз Жўрабоев, “Нефтчи” (ёшлар)дан Достон Рашидов ва иккинчи лига иштирокчиси “Рошидон”дан Рустам Абдуҳамидовдир.

Эртадан жамоа аъзолари яна Ёзёвонда машғулотларга киришишади. 2 август куни эса футболчилар тиббий кўрикдан ўтади. Сўнгра расмий баҳслар олдидан сўнгги назорат учрашуви ташкил этиш кўзда тутилган. Шу тариқа “Ёзёвон-Лочинлари” иккинчи даврага тайёргарлик кўради.