Япония аёллар терма жамоаси бош мураббийи: "Ўзбекистонга қарши қийин учрашув кутиб турибди"

- Ўйин ҳақида...

- Бугунги ўйин Олимпия учун биринчи қадам бўлди. Ўйин биз учун катта аҳамиятга эга эди. Футболчиларимдан кўнглим тўлди, уларнинг кўпчилиги бугун гол уришди. Майдон яхши ҳолатда эмаслиги учун бугун тезкор ўйин намойиш эта олмадик. Кейинги учрашувга қадар 3 кун вақтимиз бор. Машғулотларда кўпроқ ҳужум қилиш услубимизни ривожлантиришимиз керак. Кейинги учрашувлардаги рақибларимиз анча хавфли. Буёғига осон ўйинлар йўқ.

- Ҳиндистон каби зич ҳимояланадиган жамоаларга қарши ҳужум қилиш қанчалик қийин?

- Бизда кучли индивидуал маҳоратга эга футболчилар бор. 12 рақамли футболчимиз (Тагаши) бугун ажойиб ўйин ўтказди ва Ҳиндистон ҳимоя чизиғини ёриб ўтди. Унинг қанотидан уюштирилган ҳужумларнинг барчаси жуда хавфли бўлди.

- Японияда аёллар лигасида ўйнайдиган футболчилар билан легионерларнинг даражаси ҳақида гапириб ўтсангиз? Уларнинг даражасидаги фарқ катта эмасми?

- Маҳаллий футболчиларимиз бугун яхши ўйин ўтказишди. Европада тўп тепаётганлар ҳам яхши формада. Европада ўйнайдиган легионерларимиз йиғинга кечроқ қўшилишди. Улар ўртасидаги фарқ шунда холос.

- Кейинги учрашув Ўзбекистон терма жамоасига қарши. Ўзбекистон терма жамоасидан нималар кутмоқдасиз?

- Ўзбекистон мезбон жамоа ва уларга қарши ўйин осон бўлмаслиги аниқ. Ҳар бир терма жамоа ўз мухлислари кўз ўнгида яхшироқ ўйнайди. Кейинги учрашувгача бор йўғи уч кун қолди. Ўзбекистон ҳам бугун ўйнайди ва уларнинг ўйинини таҳлил қилиб чиқишимиз керак.

- Япония эркаклар терма жамоаси 2030 йилда жаҳон чемпионатида ғолиб бўлишни мақсад қилганлигидан хабардормиз. Аёллар терма жамоасининг мақсадлари қандай?

- Бизда мақсад бўйича белгиланган вақт йўқ. Биз учун энг катта мақсад келажак учун база ташкил этиш. Ҳозир қилаётган ишларимизнинг натижасини келажакда кўрамиз. Ҳозирги режамиз эса дунёнинг топ жамоалари қаторига кириш.