Янги оилага келин бўлиб тушган уятчан қизга ўхшаб қолган ПСЖ ва ЕЧЛнинг бошқа ўйинлари ҳақида
15 фев 2018 17:16
Янгиликлар
![](https://championat.asia/upload/storage/307118_original.jpg)
![](/upload/storage/307118_220.jpg)
Янги оилага келин бўлиб тушган уятчан қизга ўхшаб қолган ПСЖ ва ЕЧЛнинг бошқа ўйинлари ҳақида
Туриндаги баҳсда мухлислар 90 дақиқа тезкор ва шиддаткор футбол гувоҳига айланишди. "Ювентус" ўйинни даҳшатли бошлади. Табиийки бундай стартни "Тоттенхэм" кутмаганди. Дастлабки 10 дақиқа ичида киритилган икки гол "Тоттенхэм"ни эсанкиратиб қўймади. Аксинча, Маурицио Почеттино "Юве"нинг даҳшатли стартига тўғри реакция билдира олди. Айнан иккинчи голдан сўнг "Тоттенхэм" ўйин тизгинини ўз томонига оғдиришга эришди. Почеттино учрашувдан олдинги матбуот анжуманида жамоанинг ўйин услуби ва принципи ўзгармаслигини таъкидлаганди. "Тоттенхэм" устозининг айтган гапларини жамоа амалда исботлади. Яъни, жамоа ўз услубидан воз кечмаган ҳолда агрессив ва ҳужумкор футбол намойиш этди. "Ювентус" эса ҳисоб 2:0 бўлганидан кейин натижа учун ҳаракат қилди ва бу якунда уларга қимматга тушди.
Лондонликларнинг икки етакчи футболчилари Харри Кейн ва Эриксен томонидан киритилган голлар жамоага жавоб беллашуви олдидан чорак финалга йўл олиш учун жуда қулай имкониятни тақдим этди. Аслида воқеалар ривожи буткул бошқача сценарий остида давом этиши мумкин эди. Ўйинга бурилиши ясаши мумкин бўлган вазиятда Игуаин пенальтини аниқ амалга ошира олмади. Натижада "Тоттенхэм" мағлубиятдан қутилиб қолиш чорасини топди.
"Ювентус"нинг асосий икки фигураси Дибала ва Матюидининг йўқлиги Аллегрининг режаларига ўзгартириш киритди. Жавоб баҳсида эса катта эҳтимол билан бу футболчилар сафга қайтишлари мумкин. Бу эса "Ювентус"нинг камайган умидларига шамчироқ бўлади.
Бу тўқнашувда жавоб ўйини олдидан кўпчилик "Тоттенхэм"нинг имкониятлари ошиб кетганини таъкидламоқда. Лекин Лондонда "Ювентус" ҳали ўз сўзини айтишга уриниб кўради. Туриндаги ажойиб 90 дақиқа Лондонда 120 дақиқага айланиб кетиши ҳеч гап эмас. Ҳар иккала жамоа исталган пайтда бир-бирига қарши кураш таклиф этишга қодир. "Тоттенхэм"нинг энг асосий ютуғи шундаки, жамоа меҳмонда гол уришга эришди. Урганда ҳам битта эмас, балки икки бор "Юве" дарвозасини ишғол этди. Бу эса ЕЧЛ плей-офф босқичида яхшигина устунлик беради. Аммо шуни унутмаслик керакки, "Тоттенхэм"нинг рақиби "Ювентус" ҳам "Уэмбли"да мезбонлар дарвозасини ишғол этишга қурби етади. Бу тўқнашувда кураш асло тугагани йўқ. Аксинча ҳаммаси энди бошланмоқда.
Ювентус Гонсало Игуаин - 2', Гонсало Игуаин - 9' |
Лига Чемпионов УЕФА. Плей-офф . 1/8-тур 13/02/2018, 23:45 2
:
2
Тугади
|
Тоттенхэм Гарри Кейн - 35', Кристиан Эриксен - 71' |
Стадион: Allianz Stadium, 41232 томошабин
Бош ҳакам: Феликс Брих
Сешанба оқшомининг иккинчи жуфтлигида барча масала деярли ҳал этилди. Ҳал этилганда ҳам жуда осонлик билан. Швейцарияга сафар уюштирган "Манчестер Сити" "Базель" дарвозасига жавобсиз тўртта гол киритди. Гвардиола "Базель" тўсиғини биринчи учрашувдаёқ, меҳмондаёқ ҳал этиб қўя қолди. Бу тўқнашувнинг жавоб ўйини шунчаки расмиятчилик учун ўтказилади. "Базель" Манчестерга иккинчи таркибини юборса ҳам ҳеч ким ранжимаса керак. Шу ўринда Гвардиола ҳам жавоб баҳсида ёшларни синовдан ўтказиб олиш учун яхшигина шароит яратиб қўйди. "Манчестер Сити" Англияда ҳам чемпионликни нақд қилиб қўйган. Чорак финал чиптаси ҳам чўнтакда. Демак "шаҳарликлар" бемалол чорак финалда уларга ким рўбару келиши ҳақида бош қотириши мумкин.
Базель |
Лига Чемпионов УЕФА. Плей-офф . 1/8-тур 13/02/2018, 23:45 4
:
0
Тугади
|
Манчестер Сити Илкай Гюндоган - 14', Бернарду Силва - 18', Серхио Агуэро - 23', Илкай Гюндоган - 53' |
Стадион: St. Jakob Park, 36000 томошабин
Бош ҳакам: Йонас Эрикссон
Чоршанба оқшомидаги биринчи ўйинда "Ливерпуль" Португалияда "Порту" меҳмони бўлди. Юрген Клоппнинг тажовузкор футболи олдида жиддий қиёфадаги "Порту" ҳам сувга тушган мушукка айланди қолди. Сержиу Консейсау жамоасининг 25 ўйинлик мағлубиятсиз сериясига "Ливерпуль" нуқта эмас, ундов қўйди! Мерсисайдликлар "Порту" дарвоаси томон жавобсиз бешта тўп йўллашди ва чорак финал масаласини Португалиядаёқ ҳал этиб қўя қолди. Худди "Манчестер Сити" каби "Ливерпуль" ҳам ўз уйидаги жавоб баҳсидан ўртоқлик учрашуви сифатида фойдаланиб қолиш имкониятига эга. Бу тўқнашувда барча нарса ҳал . Жавоб ўйини эса интрига жиҳатидан ўз аҳамиятини буткул йўқотди десак ҳам бўлаверади. Шуни қайд этиб ўтиш керакки, "Қизиллар"нинг даҳшатли ҳужум чизиғи жорий мавсумда Европа чемпионлар лигасида гол уриш бобида етакчига айланиб олди.
Порту |
Лига Чемпионов УЕФА. Плей-офф . 1/8-тур 14/02/2018, 23:45 5
:
0
Тугади
|
Ливерпуль Садио Мане - 25', Мохамед Салах - 29', Садио Мане - 53', Роберто Фирмино - 69', Садио Мане - 85' |
Стадион: Estadio do Dragao, 47718 томошабин
Бош ҳакам: Даниэле Орсато
Нимчорак финал жуфтликлари ичидаги энг кўп кутилган ва муҳокамаларга сабаб бўлган тўқнашувда "Реал" ПСЖга дарс берди. Ушбу тўқнашувдан олдин кўпчилик "Реал"нинг имкониятларини паст баҳолаётган, ПСЖдаги ҳужум чизиғи қанчалик даҳшатли кучга эга эканлиги бот-бот такрорланаётганди. Лекин Мадриддаги баҳс бу тўқнашувда "Реал"ни ҳисобдан чиқаришга эрта эканлигию, ПСЖ ҳали гранд жамоа бўлиб улғаймаганини кўрсатиб қўйди. Ҳа, айнан ПСЖ бу каби катта ўйинларда қандай ўйнашни ўзлаштира олмаётгани, бош мураббий Унаи Эмери эса яна эски одатини ишга солди. Яъни, ПСЖ мураббийининг қўрқоқ тактикаси эвазига "Реал"дан жазоланди.
"Реал" шу ҳолатида ҳам таркиб борасида "қуролланган" ПСЖга катта ўйинларда қандай ўйнаш кераклиги борасида дарс ўтди. Бунгача ПСЖга ўтган мавсумда "Барселона" ҳақиқий маҳорат дарсини ўтганди. Энг қизиғи, ўшанда ПСЖ оғзидаги тайёр ошини олдириб қўйганди. Кечаги беллашувда ҳам деярли шу ҳолат кузатилди. Фақатгина бу гал бир ўйин давомида ПСЖ ўзи учун керакли ҳисобларни сақлаб қола олмади.
Тўғри, назарий жиҳатдан ПСЖда ҳали чорак финалга йўл олиш учун имконият сақланиб турибди ва жавоб ўйини ўз майдонида ўтади. Лекин жамоа бу каби катта ўйинларда ўзи даъво қилаётган топ жамоа даражасида ўйнашни ўрганмас экан, "Реал", "Бавария" ёки "Барселона" каби рақиблар олдида панд еб қолаверади.
Кечаги ғалабадан кейин "Реал"нинг иштаҳаси очилиб кетишига шубҳа йўқ. Жамоанинг ҳозирги ҳолатидан келиб чиқадиган бўлсак, Зидан эндиликда бор эътиборини Европа чемпионлар лигасида кетма-кет учинчи бор ғолиб бўлишга қаратишга мажбур. Ҳар қандай ҳолатда ҳам Париждаги жавоб ўйини нимчорак финал босқичини безаб берадиган баҳсларга айланиб кетиши мумкин. ПСЖ трансферларда сарф қилаётган пуллар, ЕЧЛ йўлидаги шунча ҳаракатлар чиппакка чиқмаслиги учун парижликлар нима қилиб бўлсада чорак финал чиптасини қўлга киритишга уриниб кўришади. Уларни курашдан чиқаришга шошилаётганимиз йўқ. Шунчаки ПСЖ ҳақиқий гранд, яъни топ жамоалар олдида ўзини янги оилага келин бўлиб тушган уятчанг қиздек ҳис қилмоқда.
Реал Мадрид Криштиану Роналду - 45', Криштиану Роналду - 83', Марсело - 86' |
Лига Чемпионов УЕФА. Плей-офф . 1/8-тур 14/02/2018, 23:45 1
:
3
Тугади
|
ПСЖ Адриен Рабьо - 33' |
Стадион: Estadio Santiago Bernabeu, 78158 томошабин
Бош ҳакам: Джанлука Роччи
Ўхшаш янгиликлар
![AMP Logo](https://championat.asia/image/logo-amp.png)
Фикрлар