Хосе Мария Мендез: "Бугун фақат мухлисларимиз учун ўйнадик"

“Биз бугун Қирғизистон ёки Саудия Арабистони учун ўйнамадик. Бугун ўзбекистонлик мухлислар учун ўйнадик. Натижа биз учун муҳим эмасди, фақатгина мухлислар учун ўйнадик. Ирсалиевда сариқ карточка бор эди. Бугун ҳам огоҳлантирилса Ироқ билан ўйнай олмасди. Шу боис уни асрадик. Артур Юнусов, Андрей Шлёма, Жамолиддин Шарипов ваДилшод Раҳматов куни кеча шамоллаб қолишганди. Аммо улар Ливан билан ўйинга тайёр ҳолатда келишди. Даврон Чориев биринчи бўлимда сариқ карточка олгач уни ҳам алмаштирдим ва майдонга бошқа тушурмадим.

Ўйинни ажойиб ўтказдик. Вазиятлар яратиб ҳисобда олдинга чиқиб олдик. Ливан иккинчи бўлимда ўйинни кучайтирди, бизнинг йигитлар ҳам бироз чарчашгани сезилди. Рустам Умаров бугун Осиёда энг кучли посбонлардан бири эканини исботлади. Ўйиндан ўйинга кучайиб боришимиз керак. Чоршанба куни Ироққа қарши жуда ҳам муҳим ўйин кутиб турибди”, - дейди Мендез.

- Ирсалиев тушмади, бир неча футзалчи касал дедингиз. Аммо шундай бўлса ҳам ғалаба бўлди. Жамоада тенг кучли икки таркиб бор деганими?
- Бизда юлдуз футзалчи йўқ. Барча мен учун бир хил савиядаги ўйинчи ҳисобланади. Бир кун Раҳматов, бир кун Абдумавлонов яхши ўйнайди. Бу эса мени хурсанд қилади.

- Кейинги ўйинни икки кундан сўнг ўтказасизлар. Бир кун дам бериладими ёки икки кун машғулот бўладими?
- Ҳозир шамоллаш эпидемияси муаммо бўлиб турибди. Баъзиларга дам берармиз, Ироққа қарши бор куч билан тайёргарлик кўрамиз.

- Ироқнинг бугунги Эронга қарши учрашувини кўрдингиз. Хатоларни кўриб чиқдингизми?
- Мен Ироқ Эронга қарши ўйинига унча эътибор қилмаган бўлардим. Ҳар қандай жамоанинг Эронга қарши ўйини ҳеч нарсани айтиб бера олмайди. Ироқнинг Хитой ва Иорданияга қарши баҳслардаги ҳаракатларини ўрганиб чиқишимиз керак.

- Юлдуз футболчи йўқ дедингиз, балки Рустам Умаров янги юлдуздир?
- Бизда жамоавий ўйин бор. Барча футзалчиларнинг статистикаси тенг. Рустам Умаров эса қойилмақом дарвозабон экани барчага маълум. Бугун Жамолиддин Шарипов шамоллаган бўлишига қарамай яхши ўйнади, балки кейинги ўйинда бошқа ўйинчига юқтирар у ҳам яхши ўйнаб берса бўлди (кулади).


Нарзулла Сайдуллаев