Хорватия - юлдузлар фабрикаси. Бу жамоани 12 йил олдин мағлуб этганмиз

Ўшанда "шахматлилар" Францияда ўтказилган катта мундиалда муносиб ўйин кўрсатиб, учинчи ўринни қўлга киритганди.

Катта ёшдаги мухлислар Давор Шукер, Славен Билич, Алёша Асанович, Роберт Просинечки, Звонимир Бобан, Роберт Ярни каби футболчиларни яхши эслайдилар. 1998 йилги ЖЧда айниқса Давор Шукернинг ўйини кўпчиликка манзур келганди. Хорватиялик ҳужумчи 6та гол билан энг яхши тўпурар бўлгани ҳам ёдда бўлса керак.

Бугун ўша "Олтин авлод"нинг давомчиларига қарши майдонга тушамиз. Бу U-17 Жаҳон чемпионатида Хорватия ўсмирларига қарши биринчи марта рақиб бўлишимиз эмас. 2013 йил БААда ўтказилган ўтказилган кичик мундиалда ҳам Хорватия билан ўйнаб 2:1 ҳисобида ғалаба қозонганмиз. Фужайра шаҳрида бўлиб ўтган беллашувда ҳисоб 1:1 бўлиб турган пайтда, ўйин тугашига 10 дақиқа қолганида Жамшид Болтабоев тўп киритиб, вакилларимизга 2:1 ҳисобидаги ғалабани тақдим этганди. (Ўшанда Нодирхўжа иккаламиз стадионда эдик).

Ўша мундиалда биз ва Марокаш гуруҳдан чиқиб, Хорватия ва Панамани ортда қолдириб кетганмиз. Энг қизиғи, Панама билан ҳам ўшанда ўйнаган эканмиз. Бугун яна тарих такрорланаётгандек. Панама ўсмирлар термасини гуруҳ босқичида ишончли ҳисобда мағлуб этдик. Энди эса плей-оффда Хорватия билан тўқнаш келамиз. 

12 йил олдин 24 октябрь куни Хорватияни 2:1 ҳисобида енгиб, гуруҳдан чиққандик. Бугун ҳаракат қилсак, яна тарихни такрорлашга яқинмиз. Фақат бу сафар ғалаба қозонсак, мусобақанинг 1/8 финалига йўл оламиз.

Ҳозирги Хорватия ўсмирлар термаси анча кучли кўриняпти. Жамоа гуруҳда икки ғалаба ва бир дуранг қайд этиб, 7 очко тўплади. Ва учта ўйинда ўз дарвозасидан атиги битта гол ўтказди. Хорватия U-17 гуруҳда Сенегал билан 0:0 ўйнаб, БААни 3:0, Коста Рикани эса 3:1 ҳисобида мағлуб этди.

Хорватия футболи Европа етакчи ўринларда туради. Мамлакатдан тез-тез номдор футболчилар чиқади. Биргина Лука Модричнинг қанчалик машҳур экани ҳаммага маълум. Биз бугун жуда яхши жамоага қарши ўйнаймиз. Хорватияни мағлуб этиш ўсмирлар терма жамоамизни яна бир поғона юқорига кўтаради. Биз мана шундай жамоалар билан елкама елка ўйнабгина кучайишимиз мумкин. Муҳим ўйин олдидан ўсмирлар термамизга омад тилаб қоламиз. 12 йил олдинги тарих такрорланишига умидвормиз. 

Х.Холиқов.