Воҳид Холбоев "Лабса"даги энг ожиз нуқтани айтди

"Рақиб ёмон жамоа эмас. Бекорга улар гуруҳнинг юқори ўринларида юрмаябди. Бухорода биз бундан-да яхшироқ ўйнагандик, нисбатан осонроқ бўлганди, кўплаб вазиятлар яратгандик.

Иккинчи бўлимда ғалати ўйин бўлди. Икки жамоа ҳам ютиб кетиши мумкин эди. Ҳужумчиларимиз ёшлик қилди барибир, агар тажрибали, ёши катта футболчилар бўлганида хатоларни кечиришмасди. Жамоа барқарорликни намойиш эта олмаяпти.

Ҳозирги замонавий футболда уй-сафар деган тушунча бўлмаяпти. Шу боисдан барча учрашувларда икки томоннинг ҳам имкониятлари тенг баҳоланмоқда. Асосийси футболчилар мураббийларнинг кўрсатмаларини бажара олишса, барчаси яхши бўлади.

Фарруҳ Шотурсуновнинг йўқлиги билинди. Ўтган ўйинга қараганда камроқ ҳужумлар уюштирдик. У ва Мурод Ражабов биргаликда марказни ўз қўлларига олишганди. Аммо Фарруҳ йўқлиги сабабли ўйинимизда узилишлар юзага келди.

Ҳа, охирги ўйинлар қизил карточкамиз кўпайди. Футболчилар ўзларини боса олишмаяпти. Руҳий томондан яхши тайёргарлик кўришмаяпти. Ўйлайманки, буни тузата оламиз.

Рақиблардаги энг ожиз нуқта - дарвозабон эди. Футболчиларимга кўп айтаман, қулай нуқта бўлса дарвозага зарба бериш керак. Бироқ улар телевизорда кўрганини қилишни исташади. Охиригача бориб, чизиқнинг устидан гол ургиси келади. Аммо бу каби дарвозабонларга узоқдан зарба бериб туриш керак.

"Лабса"га омад тилайман", - деди Холбоев.

Миржалол Норматов суҳбатлашди