“Водий футболи”. Шукурали Пўлатов дербида майдонга туша олмайди

“Андижон”: Асқаралиев ва Отахонов таркибга қайтди

Андижонликлар шанба оқшомида азалий рақиби “Нефтчи”ни қабул қилади. Водий дербисининг навбатдаги баҳсига “бургутлар” ҳам астойдил тайёргарлик кўрмоқда. Ўтган турда дисквалификация сабабли майдонга туша олмаган Санжар Асқаралиев билан Иброҳим Отахонов бўлажак ўйинда иштирок эта олади. Фақат бу мураббийнинг қарорига боғлиқ бўлади.


“Навбаҳор”: Эртага ўйин

Айни пайтда Тошкентдаги “Ўзбекистон” меҳмонхонасида истиқомат қилаётган “Навбаҳор”ни эртага яна бир жиддий ўйин кутиб турибди. Боиси мамлакат кубогининг 1/8 финал дастлабки учрашувида Тошкентнинг “Локомотив” клуби меҳмони бўлади. Мазкур учрашувдан олдин такркибда йўқотишлар бўлиб, ўтган учрашувда қизил карточка майдонни тарк этган Отабек Валижонов эртанги баҳсда майдонга туша олмайди. Дарвоқе, эртага Бахтиёр Ашурматов захира ўриндиғида ўтириб, шогирларига кўрсатма бериб боради. Ўтган учрашувдан сўнг унинг дисквалификация муддати поёнига етди.


“Нефтчи”: Шукурали Пўлатов дербида майдонга туша олмайди

Ушбу ҳафтада “Нефтчи”ни меҳмонда яна бир қийин ўйин кутиб турибди десак муболаға бўлмайди. Боиси “Андижон” ўтган турдаги мағлубиятдан сўнг бу сафар ўз майдонида мухлисларини фақат ғалаба билан хурсанд қилиши талаб этилади. Одатда дербида жамоаларнинг турнир жадвалида эгаллаб турган ўрни ҳеч қандай аҳамият касб этмайди. “Андижон” ва “Нефтчи”нинг навбатдаги тўқнашуви олдидан фарғоналиклар таркибида жиддий йўқотиш бўлиб, бу – марказий ҳимоячи Шукурали Пўлатовнинг дисквалификация туфайли майдонга туша олмаслигидир. Ўтган мавсумнинг иккинчи даврасида “Андижон” шарафини ҳимоя қилган Аббос Махсталиев эса жарохатдан сўнг тикланиш жараёнини ўтказмоқда.


“Қўқон-1912”: Жамоа бугун йиғилади

“Локомотив”га қарши баҳсдан кейин мураббийлар штаби футболчиларга бироз дам берганди. Бугун жамоа яна Қўқонда йиғилади ва навбатдаги учрашувга тайёргарликни бошлайди. Маълумки, 31 май куни “Қўқон-1912” ўз майдонида “Навбаҳор”ни қабул қилади.

Айтиш лозимки, бўлажак баҳснинг бошланиш вақти маълум бўлди. Хусусан 30 май шанба куни, ёшлар лигасидан ўрин олган “Қўқон-1912” – “Навбаҳор” баҳси одатдагидек “Марказий” стадионда кечади. Учрашув соат 16:30да бошланиши кўзда тутилган. 31 май куни эса олий лиганинг 11-туридан ўрин олган “Қўқон-1912” – “Навбаҳор” учрашуви эса соат 17:00да старт олади.