“Водий футболи”. “Навбаҳор” – “Бухоро” ўйини танаффусида ёш болалар тақдирланади

“Андижон”: Бугун Зоминда ўйин

Бугун олий лигада 12-тур учрашувларига старт берилади. Кеча Жиззахга келган “Андижон” жамоаси Зоминда “Сўғдиёна”га қарши майдонга тушади.
Албатта ҳайрон қолиш мумкин, аввалги турда “Сўғдиёна” ўз майдонида “Пахтакор”га қарши баҳсни Янгиерда ўтказганди. Бу сафар ўйин Зоминда бўлмоқда. Жиззахга 3 очко илинжида келган жамоамиз бу ўйинда майдонга ғалаба қозониш учун тушади.


“Қўқон-1912”: Жамоа кеча Гулистонга етиб келди

Маълумки бугун “Қўқон-1912” Бекободда “Металлург” билан куч синашади. Бўлажак баҳсга жиддий ҳозирлик кўрилди. Жамоа аъзолари кеча Гулистон шаҳридаги Олтин водий меҳмонхонасига келиб жойлашди. Тушликдан сўнг Бекобод томон йўлга чиқилади. “Металлург” билан ўйин олдидан таркибда ўзига яраша муаммолар бўлиб, Иззат Ғаниев жарохат сабаб мазкур учрашувни ўтказиб юборса, сариқ карточкалари сони 4тага етган ҳимоячилар Илья Ильин билан Хуршид Мухторов ва шунингдек ёшлар лигасининг ўтган турида иккинчи сариқ карточаки олиб, майдондан четлатилган Маъруф Зокиржонов бугунги баҳсни ўтказиб юборадиган бўлди.
Эслатиб ўтамиз, бугун “Металлург” – “Қўқон-1912” баҳси соат 18:00да старт олади!


“Навбаҳор”: “Бухоро” билан ўйиннинг танаффус вақтида ёш болаларни тақдирлаш маросими бўлиб ўтади

Бугун “лочинлар” ўз майдонида “Бухоро” билан ўйнайди. Мазкур учрашувнинг танаффус вақтида “Навбаҳор” ФК қошидаги “Умид” футбол мактаби тарбияланувчилари бўлмиш 1999 йил ва 2003-2004 йилда туғилган ёш футболчиларни тақдирлаш маросими бўлиб ўтади. Сабаби яқинда Марғилон шаҳрида бўлиб ўтган турнирда 2003-2004 йилда таваллуд топган ёш футболчилар 2-ўринни қўлга киритган бўлса, Самарқанддаги мусобақада 1999 йилдаги футболчилар 3-ўринни эгаллади.


“Нефтчи”: Бугун ёшлар жамоаси ўйнайди

Ёшлар лигасининг 12-тур ўйинлари бугун ҳам давом эттирилади. Баҳром Ҳайдаров бошқарувидаги “Нефтчи” ёшлар жамоаси Қиргулидаги “Нефтчи СК” стадионида “Олмалиқ” ёшлар жамоасига қарши баҳс олиб боради. Учрашув соат 17:30да старт олади.
Айтиш лозимки, “Нефтчи” ёшлар жамоас 9 очко билан турнир жадвалининг сўнгги поғонасини банд этиб турибди. “Олмалиқ” ёшлари ҳисобида эса 19 очко мавжуд. Эгаллаб турган ўрни эса 5.