Вали Келдиев: "Кимдир хато қилса қандайдир шубҳа пайдо бўлади"

- "Навбаҳор" кўп йиллик жамоа. Улар Олий лигада қолиш учун жиддий курашишди. "Норин" эса Олий лигага чиқиш вазифасини бажармоқчи эди. Аммо бу ишни уддалай олмадик. Бугунги баҳсда жамоамиз ёмон ҳаракат қилмади. Яхши  ўйнадик, аммо натижа биз истагандек бўлмади. Жамоамиз ўйин ташкил этишда яхши ҳаракат қилди, вазиятлар яратилди. Аммо ҳужумларни самарали якунлашда қийналдик. "Навбаҳор" эса дарвозамизни осон ишғол этди.

- Дарвозабон иккита голда шубҳали ҳаракат қилди. Бунга қандай изоҳ берасиз?

- Хато қилганидан кейин қандайдир шубҳа пайдо бўлади. Футболда охирги ўйинчи дарвозабон ҳисобланади. Унда босим юқори бўлади. Шу боис дарвозабонимиз бугун кўпроқ босим остида қолгандек туюлди. Шунинг ҳисобига дарвозабонимиз ўзини ўнглолмади. Биринчи лига футболчилари бўлганликлари учун ҳам янада кўпроқ босимда ўйнашди.

- Ўйиндан олдин жамоа раҳбарият билан йиғилиш бўлдими? Агарда бўлган бўлса, унда йиғилишда қайси масалар муҳокама қилинди?

- Жамоамиз олдига қўйилган вазифа Олий лигада чиқиш эди. Аммо "Навбаҳор" жамоаси тажриба эвазига бугунги беллашувда ғалаба қозонди. Шу ерда Олий лига ва биринчи лига тафовути сезилиб қолди.

- Ўтган мавсум "Норин" учун қандай ўтди?

- Бу йилги мавсум биз учун ёмон ўтмади. Лекин яхши ўтди деб кўзланган мақсадни охиригача етмаслик бизнинг футболдаги касаллик бўлса керак. Агарда кўзланган мақсадимизга етганимизда, ўшанда яхши ўтди деб бемалол айтсак бўларди.

- Жамоангиз бугун кўпроқ 3-5-2 схемаси ҳаракатланди. "Норин" ҳар доим шу схемада ўйнайдими ёки фақат бугун шу услубда ўйнадими?

- Йўқ. Биз вазиятдан келиб чиқиб шу схемада ўйнадик. Рақиб бир киши кам бўлиб қолганди ва биз мағлубиятга учраётгандик.

- Жамоадаги келажагингиз ҳақида нима дея оласиз?

- Ҳозирча бу номаълум. Келаси мавсумда нима бўлишини раҳбарият йиғилиш ўтказса гаплашиб оламиз.