Вадим Абрамов: "Ўйин осон кечмади"

Ўйин ҳақида
- Ғалаба қозонган бўлсак-да, ўйин оддий кечмади. Рақиб бизга жиддий қаршилик кўрсатди ҳамда тартибли футбол намойиш этди. Ўйлайманки, Эдгар Гесс Андижонда яхши жамоани шакллантиради. Иккинчи даврада бу жамоага қарши тўп тепиш биз учун осон кечмайди. Ўйиндан тўлиқ қониқдим дея олмайман. Чунки Осиё чемпионлар лигасида гуруҳдан чиқа олмадик ва бундан ҳаммамиз тушкун кайфиятдамиз.

Катта Жасур Ҳасанов ҳақида
- У шамоллаб қолди. Шу боис сафарда "Фулад"га қарши баҳсда ҳам, бугунги ўйинда ҳам майдонга тушмади.

Коряннинг алмаштирилиши ҳақида
- Биз ўйинни иккита ҳужумчи билан бошладик, кейин вазиятни ўзгартиришга тўғри келди ва Руслан Корянни алмаштирдим. Мақсадимиз майдон марказини кучайтириш эди ва Корян ўрнига Икром Алибоевни туширдик.

Навбатдаги рақиб ҳақида
- Кейинги турни сафарда "Олмалиқ"қа қарши ўтказамиз. Жуда қизиқ ўйин бўлади деб ўйлайман. "Олмалиқ" ҳам ҳозир етакчилар сафида боряпти ва яхши шаклланган жамоа ҳисобланади. Биз бу рақибга қарши жиддий тайёргарлик кўрамиз.

ОЧЛ якунлари ҳақида
- Бу борада шахсий фикрим шуки, январда Осиё Кубоги ўтказилгани ОЧЛда иштирок этган клубларга таъсир қилди. Шу боис биздан ҳеч қайси жамоа гуруҳдан чиқа олмади. Албатта, бу менинг шахсий фикрим. Қолаверса, бизнинг гуруҳда "Ал Ҳилол", "Ал Садд" каби кучли жамоалар бор эди ва улар билан рақобатлашиш қийин кечди. Келаси йил ОЧЛда ижобий натижа қайд этамиз деб умид қиламан.