Вадим Абрамов: "Ҳакам "Бунёдкор"дан хафа бўлгандир..."

"Менимча ўйин қизиқарли бўлди, афсуски томошабинлар киритилмади. Балки ТВ орқали ўйинни кўришгандир, уларга ёққадир, билмайман. Қийин ўйин бўлди, айниқса бош мураббийлар учун. 6та гол урилди, қизиқарли ўйин, аммо... Биринчи тайм у қадар яхши ўйнамадик, иккинчи таймда ўзимизга келдик, ғалаба қозона олмаганимизга ўзимиз айбдормиз. Ёш йигитлар гол ура олишмади, тўртинчи голни уриб ўйинни якунлашимиз керак эди. Бунинг ўрнига рақибга гол уриш имконияти берилди.

Балки бу руҳият билан боғлиқдир. Шунчаки тўпни бир-бирингизга оширинг деган кўрсатма бермаганман. Балки ҳар уч кунда ўйин ўтказаётганимиз сабабдир.

Икромов майдонга тушиб фаол ўйнади, нима учун у иккинчи таймда тушди? Унинг имкониятларини яхши биламиз, бу тактика эди. Биринчи таймда рақиб катта куч билан ҳимояда ўйнашини кутгандик, шу боис Фарруҳни иккинчи таймда туширдик ва тезкорлигидан фойдаландик.

Ҳакамлик ҳақида? Футболчилар ҳам баъзида ёмон ўйнашадику, бугун ҳакамларда шундай кун бўлди деб ўйлайман. Бу сотиб олинган ҳакамлик бўлмаган деб умид қиламиз. Балки у (Шерзод Қосимов - таҳририят) "Бунёдкор"дан хафадир, ундан сўраб кўриш керак", - дейди Вадим Абрамов.