Улуғбек Бакаев: "Мен учун ёш ўйинчи деган тушунча йўқ. "Навбаҳор"га қарши ғалаба учун майдонга чиқамиз"

– Ўйин ҳақида фикрингиз

– Омадсиз ўйинлардан кейин бугун йигитлар ғалаба қозонишни исташганди. Икки баробар қийин бўлди. "Локомотив" ажойиб жамоа, ўйинчилар сифати жуда яхши. Уларда ўйин бошида яхши вазиятлар бўлди. Биз стандарт вазиятдан гол уриб, ўзимизга бўлган ишончимизни оширдик. Иккинчи бўлимда ҳам шундай бўлди ва рақибни қарши ҳужумда ушладик. 

– Бугун жуда кўп ёш ўйинчилар майдонга тушишди. Бу ҳақда нима дея оласиз?

– Нима ҳам дея оламан. Мен учун ёш ўйинчи деган тушунча йўқ. Мен уларни жамоа ўйинчиси сифатида кўраман. Уларнинг паспортига қарамаймиз. Кўп футболчиларга ўзини кўрсатиш учун имконият беряпмиз. Бугунги ўйин агар ҳаракат қилмасангиз, қийналиб қолишингизни кўрсатди. 

– Жамоа кейинги босқич йўлланмасини 80% га уддалади. Келажакда қандай мақсадлар бор?

– Ҳар бир турнирдан мақсадимиз бор. Бошида гуруҳдан чиқиш эди вазифамиз эди. Ҳозир ҳам бу ишни уддалаганимизча йўқ. Рақибни мағлуб қилиб, кейинги босқичга чиқишни мақсад қилганмиз. 

– "Бухоро" жамоасида бир неча мағлубиятлар бўлди. Кейинги ўйинда "Навбаҳор" кутиб турибди. Бу ўйиндан кутилмалар қандай?

– Ўзбекистон чемпионатидаги ҳар бир тур кутилмаган воқеалар тақдим қилади. "Навбаҳор"га қарши ўйинга тайёрланамиз. Фақат ғалаба учун майдонга тушамиз, уёғи нима вазият юз беришига боғлиқ.