U-23 Осиё чемпионати 2-тур олдидан: Бугун муҳим ўйин бор

Бугун Ўзбекистон ёшлар терма жамоаси гуруҳ босқич 2-тур учрашувини Эрон U-23 жамоасига қарши ўтказади. Ар Риёд шаҳридаги Prince Faisal Bin Fahd стадионида кечадиган баҳс бизнинг вақт билан 19:00да бошланади.

Аввалги тур

Равшан Ҳайдаров бошчилигидаги терма жамоамиз мусобақани ғалаба билан бошлади. Дастлабки турда вакилларимиз Ливанни 3:2 ҳисобида мағлуб этишди. Амирбек Саидов, Равшан Хайруллаев ва Сардор Баҳромов томонидан киритилган голлар илк турда қийин ғалабани тақдим этди.

Эрон ёшлар терма жамоаси эса Жанубий Корея U-23 термасига қарши майдонга тушиб 0:0 ҳисобида дуранг қайд этди. Бу ўйинда форслар ҳам, кореяликлар ҳам ютиб кетиши мумкин эди. Кўпроқ битта гол баҳс тақдирини ҳал этадиган учрашувга ўхшади, аммо гол уриш томонларга насиб этмади.

Мураббийлар фикри

Равшан Ҳайдаров (Ўзбекистон U-23 терма жамоаси бош мураббийи): - Биз биринчи ўйиндаги хатолардан хулоса чиқардик. Ўйлайманки, бугунги ўйинда бунақа кулгули хатолар қайтарилмайди. Эроннинг Жанубий Кореяга қарши баҳсини ўрганиб чиқдик. Рақиб ҳақида маълумотга эгамиз. Бу чемпионатда имкон қадар узоққа боришни мақсад қилганмиз. Эрон - кучли жамоа, рақибни ҳурмат қилган ҳолда ғалаба қозонишга ҳаракат қиламиз.

Омид Раванхах (Эрон U-23 терма жамоаси бош мураббийи): - Биринчи ўйинни яхши ўтказдик деб ўйлайман, ҳартугул бир очкога эга чиқдик. Энди бўлса Ўзбекистон билан кечадиган баҳс чорак финал тақдирини ҳал қилади. Рақиб кучли эканини биламиз, буни футболчиларимиз ҳам яхши тушуниб турибди. Ўзбекистон - футбол жадаллик билан ривожланаётган мамлакатлардан бири деб айта оламан. Уларнинг эришаётган натижалари ҳам ажойиб.

Рақамлар

- Бугунги ғалаба ёшлар терма жамоамизни муддатидан олдин чорак финалга олиб чиқади.

- Бунгача ҳар икки жамоа U-23 Осиё чемпионатида икки бор тўқнаш келган бўлиб, ҳар иккала баҳс 1:1 ҳисобида дуранг билан якун топган.

- U-23 Осиё чемпионатида Эронга гол урган футболчиларимиз: 2020 йил Ислом Қобилов, 2022 йил Отабек Жўрақўзиев.