Туркманистон бош мураббийи: "Ўзбекистон хатоларни кечирмайди. Ўйинга тўғри ёндашилса, бу жамоа Эронни мағлуб эта олади"

- Учрашув ҳақида фикрингиз?

- Натижа қониқарсиз бўлди, учрашув давомида яхши ўйнашга уриндик. Ҳимоядаги хатолар туфайли ютқаздик. Айтганимдек, Ўзбекистон хатоларни кечирмайди. Ишлашда давом этамиз, хатоларни камайтиришга ҳаракат қиламиз.

- Бугун терма жамоа сафида бир клубдан 8 нафар футболчини туширдингиз. Бу клуб терма жамоа базавий клубими?

- Олдин айтганимдек, бу клуб терма жамоанинг базавий клуби ҳисобланади. Футболчилар биргаликда ўйнашади ва барча бир-бирини яхши тушунишади. 

- Биринчи бўлимда яхши ўйнадинглар, балки хориждан жисмоний тайёргарлик бўйича мураббий чақирилар? 

- Тўғри айтдингиз, жисмоний ҳолатимиз бўйича муаммо бор. Таклифингизни ўйлаб кўрамиз. Биринчи таймда яхши ўйнаб, иккинчи бўлимда чарчоқ пайдо бўлмоқда. Терма жамоа либосини кийганда, номуҳим ўйин бўлмайди. Баъзи футболчиларга дам беришга қарор қилдим, уларни кейинги ўйинга асрадик. Терма жамоада жиддий жароҳат бўлмади. 

- Ўзбекистон терма жамоаси сиз кутгандек ўйнадими? 

- Ўзбекистон охирги пайтда ҳайрон қолдирмаяпти, футболчиларнинг класси ва техник қобилиятлари юқори. Барчаси деярли биз кутгандек бўлди, ўзимиз рақибга гол уриш учун кўпроқ имконият беряпмиз. Ҳимояда тактик кўникмаларни кучайтиришга ҳаракат қиламиз. 

- Эронга ҳам, Ўзбекистонга ҳам қарши беллашдингиз. Эроннинг кучли томонлари ҳақида нима дея оласиз? 

- Тошкентда бу жамоалар ўртасидаги баҳсда бежизга дуранг қайд этилмади, унда бир-бирига тенг жамоалар беллашганди ва натижа адолатли бўлганди. Ўзбекистон терма жамоасига омад тилайман. Ўйинга тўғри ёндашилса, Ўзбекистон Эронни мағлуб эта олади.