Transfermarkt ва Championat.Asia 2022 йилги Суперлиганинг энг яхши мураббийи ва футболчисини аниқлади

Transfermarkt ва Championat.Asia мавсум якунига кўра энг яхши мураббий ва ўйинчи номини ҳам аниқламай қўйишмади. Овоз беришда Championat.Asia ва Transfermarkt'нинг рус тилидаги нашри, шунингдек эксперт сифатида Ўзбекистондаги энг яхши футбол шарҳловчиларидан бири Отабек Жўраев иштирок этишди.

Овоз бериш якунларига кўра, Суперлиганинг 2022 йилги мавсумдаги энг яхши мураббийи деб Тимур Кападзе топилди. "Олимпик" устози Ўзбекистон чемпионатида ёш ўйинчилардан ташкил топган жамоани илк мавсумдаёқ олтинчи ўринга олиб чиқди. "Олимпик" мавсум давомида бир неча бор фаворитлардан очко тортиб олди. Кападзе 44% овозга эга бўлган бўлса, иккинчи ўринни "Пахтакор" бош мураббийи Максим Шацких (31%) эгаллади.

Суперлиганинг 2022 йилги мавсум энг яхши ўйинчиси бўлиш учун курашда биринчи ўрин "Навбаҳор" ярим ҳимоячиси Жамшид Искандеровга насиб этди. У барча мусобақаларда 33та ўйинда майдонга тушиб, 11та гол ва 7та ассист қайд этди. Искандеров 52% овоз тўплади, бу эса иккинчи ўринни олган "Пахтакор" форварди Драган Черан (34%)дан 18%га кўпроқ.