Тошкентнинг “Ливерпуль” жамоаси Янги йил байрамини нишонлади
28 дек 2013 18:20
Янгиликлар

Тошкентнинг “Ливерпуль” жамоаси Янги йил байрамини нишонлади

Бугун, 28 декабрь куни пойтахтимиздаги “Бухоро” ресторанида “Ливерпуль-Гол” болалар футбол клуби аъзолари 2013 йил якунларига бағишланган ўзларининг тантанали тадбирини ўтказишди.

2009 йили ташкил этилган “Ливерпуль-Гол” болалар футбол клуби бу йил Тошкент шаҳар болалар-ўсмирлар биринчилигида 2-дивизионда умумжамоа ҳисобида ғолибликни қўлга киритди. Шу муносабат билан бугунги байрам маросимида клубнинг учта тоифасидаги гуруҳ футболчиларига ғолиблик учун эсдалик совғалари ҳамда фахрий ёрлиқлар топширилди.

Ўз вақтида Азизбек Ҳайдаров, Азиз Ибрагимов, Александр Лобанов каби ҳозирда таниқли бўлган йигитларни тарбиялашган Ўзбекистонда хизмат кўрсатган мураббий Анвар Ўринов, Миржамил Ғуломов каби мутахассислар Тошкентдаги “Ливерпул”нинг раҳбарлари саналишади. Улардан ташқари, ўтмишдаги машҳур ўйинчилар – Дилмурод Назаров, Самандар Акбаров, Рустам Яралиев, Асад Расулов ҳамда Отабек Қодиров шу даргоҳда болаларга футбол сирларини ўргатишмоқда.

Бугунги тадбирда 2013 йилги Тошкент шаҳар чемпионати 2-дивизионида ғолибликка эришган қуйидаги гуруҳлар тақдирланишди: 2001-2002 йиллар (мураббий Самандар Акбаров), 2000 йиллар (мураббий Миржамил Ғуломов) ҳамда 1998-1999 йиллар (мураббий Дилмурод Назаров).
Улуғбек Мирзаев

Ҳавола :

Манба : championat.asia

Янгиликларни Телеграмда ўқинг!

Рейтинг: