Тимур Кападзе: “Термамизнинг бугунги ғалабаси байрамга ажойиб совға бўлади”

Ушбу ўйин олдидан Ўзбекистон терма жамоаси собиқ футболчиси Тимур Кападзе ўз фикрларини билдирди.

“Бугун Сурия терма жамоасига қарши жуда ҳам муҳим ўйин бўлади. Барчамиз ушбу учрашувни интиқлик билан кутаяпмиз. Кўпчилик Сурия термасини гуруҳимиздаги оутсайдер жамоа деб ўйласа керак. Бугунги рақибимиз шу ергача келибдими, демак гуруҳимизда кучсиз жамоанинг ўзи йўқ. Ҳозирги кунда футбол ривожланиб бормоқда. Шунинг учун бугун биз учун осон ўйин бўлади деб ўйламайман. Сурия ҳам ўз олдига қандайдир мақсад қўйган. Рақибимиз қай даражада эканини биз билмаймиз. Бошқа рақибларни мисол учун, Жанубий Корея терма жамоасини қай даражада эканлигини биламиз. Чунки, уларга қарши кўп бор тўқнаш келганмиз.

Сурия терма жамоаси ҳақида бизда кўп маълумотлар йўқ. Меҳмон жамоа бугунги ўйинга қай даражада тайёргарлик кўрган ва уларнинг ўйин услублари қай даражада эканлигини билиб оламиз. Агарда Сурия ҳам ушбу ўйинга жиддий қараган бўлса терма жамоамиз учун анча қийинчилик туғдириши мумкин. Менимча Сурия термаси бугун иккинчи рақам остида ҳимоявий ўйин кўрсатади. Бизнинг футболчилар рақиблари дарвозасига тезкор гол уриб олишса ўйинлари янада очилиши мумкин. Қандай ҳисоб бўлишидан қатъий назар энг муҳими ғалаба. Бугунги ўйиндаги ҳисоб каттароқ кўринишга эга бўлса биз учун айни муддао бўлар эди. Чунки, ўтган сафардаги саралашга ўхшаб гуруҳдаги сўнгги тур ўйинида муҳим рол ўйнаши мумкин. Биз уйда ўйнаяпмиз, агарда “реал” қарайдиган бўлсак Сурия термаси гуруҳдаги энг кучсиз жамоа. Термамиздаги футболчиларнинг деярли яримидан кўпи анчадан бери жамоада ўйнаб келишмоқда. Янги футболчилар ҳам терма жамоага жалб қилинишган.

Бугунги ўйинда кўпроқ легионер футболчиларга кўпроқ эътибор қаралса керак. Бугун футболчиларимизда ғалабага бўлган хоҳиш жуда ҳам кучли бўлади. Сабаби, бугун байрам, агар ғалаба қозонишса мустақиллигимизнинг 25 йиллиги учун ажойиб совға бўларди. Индивидуал тарафдан оладиган бўлсак футболчиларимиз суриялик футболчилар устун. Ҳозирдан бир ранса дейин қийин, барчаси ўйинда маълум бўлади. Биз гуруҳдаги бошқа рақибларимиз ўйинларига эътибор бермаслигимиз керак. Асосан ўз уйимиздаги ўйинларда очко йўқотмаслигимиз керак. Агарда гуруҳдаги бошқа рақибларимиз ўзаро ўйинларида дуранг натижа қайд этишса биз учун анча яхши бўлади. Ҳозир биринчи ўйинда ўзимизни ўйинимизни ўйлашимиз керак.

Барча юртдошларимизни мустақиллигимизнинг 25 йиллиги билан чин қалбимдан табриклайман. Юртимиз тинч, осмонимиз мусаффо бўлиб мустақиллигимиз абадий бўлсин. Бу йил Рио 2016 Олимпиадасида олимпиячиларимиз ўзларини ғалабалари билан барчамизни хурсанд қилди. Биз футболчилар ҳам ўзимизни ғалабаларимиз билан барча футбол мухлисларини хушнад қиламиз. Насиб қилса миллий терма жамоамиз 2018 йилги мундиал йўлланмасини қўлга киритишади”, - дейди “Локомотив” клуби ва миллий терма жамоа собиқ футболчиси Тимур Кападзе.

Жаҳонгир Сотволдиев суҳбатлашди.