Тимур Кападзе "Олимпик"нинг кубокдаги мақсадини айтди

Ўйин ҳақида

- Ўйиндан қониқдим десам ҳам бўлади. Бугун ғалаба қозонишга ҳаракат қилдик. Ғолиблик кайфиятда келгандик. Ўйин осон бўлмаслигини билардик. Сабаби, "Андижон" ҳам яхши шаклланган жамоа, уларнинг ҳам олдига қўйган вазифалари мавжуд. Ўйин давомида вазиятлар яратдик, қаердадир ўхшади, қаердадир ўхшамади. Афсуски, имкониятлардан фойдалана олмадик. "Андижон" билан яқинда ўйнагандик. Бугунги ўйиндан сўнг ушбу рақибга қарши яна қандай услуб намойиш этиш мумкинлигини кўриб олдик. Учрашувдан тегишли хулоса чиқарамиз. Энди чемпионат баҳсига тайёргарлик кўрамиз. 

- "Андижон"га қарши чемпионат баҳсида жамоа 0:1 ҳисобида ютқазганди. Жамоанинг аввалги ва бугунги ўйинида қандай фарқни сездингиз?

- "Андижон"га қарши уй учрашувимизда ўз дарвозамиздан гол ўтказиб юборганимиздан сўнг рақиб ҳимояга эътибор қаратганди. Бугун эса, айниқса, биринчи бўлимда очиқ ўйин гувоҳига айландик. Иккинчи бўлимда эса рақиб яна ҳимояланди, лекин буни билардик. Баъзи вазиятларда улар очилишди, ўшанда бизда имкониятлар бўлди. Бундан фойдалансак бўларди. 

- "Олимпик"нинг кубокдаги мақсади қандай?

- Гуруҳдан чиқиб, олға боришга ҳаракат қиламиз. Қанча узоқроққа борсак, шунча кучли жамоаларга рўбарў келамиз. Бу эса бизга тажриба бўлади.