Тимур Ҳакимов: “Нефтчи”даги фаолиятимдан кўнглим тўлмади”

Ҳужумкор ярим ҳимоячи ўтган мавсумнинг иккинчи қисмини “Нефтчи”да ўтказди. Фарғонада Вадим Абрамов унга катта ишонч билан қаради. Аммо негадир Тимур у ерда асосий таркиб аъзоси бўлишга қийналди. Яқинда у билан боғланиб, шу ҳақда сўрадик.

- Тимур, ўткан мавсумнинг иккинчи қисмини олий лигада ўтказдингиз. “Нефтчи”даги фаолиятингиз хусусида нима дейсиз?
- Жамоага бош мураббий Вадим Абрамов таклиф этгач, албатта у ерга улкан ниятлар билан боргандим. Ўз ўйинларим билан жамоага фойда келтириб, ютуқларига ҳиссамни қўшиш учун харакат қилдим. Лекин “Нефтчи”да ўтказган ярим мавсумимни таҳлил қиладиган бўлсам, рости фаолиятимдан у қадар кўнглим тўлмади. Чунки жамоа аутсайдерлар қаторидан ўрин олди. Биз футболчилар бу вазиятдан олиб чиқиб кета олмадик. Албатта бунда ўзимни ҳам қайсидир маънода айбдор деб биламан.

- Яқинда “Нефтчи”ни бутунлай тарқалиб кетди деган хабарни ўқиган бўлсангиз керак?
- Ҳа, сайтда кўрдим. Бу ҳақда ҳар ким ўз фикрини билдирмоқда. Билмадим ким нима дейди. Лекин мен шуни айтишим мумкинки, “Нефтчи” бутунлай йўқ бўлиб кетмайди. Ахир жамоа ўз тарихи ва ўрнига эга. Менимча энди жамоа янгитдан ташкил топса керак.

- Ўзингиз “Нефтчи”даги фаолиятингизни давом эттирасизми ёки яна жамоани ўзгартирасизми?
- 31 декабрь куни жамоа билан тузган шартномам ўз кучини йўқотди. Фикримча энди у ерда бошқа ўйнамасам керак.

- Келгуси режалар қандай?
- Бу борада ҳозирча аниқ бир тўхтамга келмадим. Яқин орада кейинги тақдиримга тўлиқ ойдинлик киритилади деган умиддаман.

- Таклифлар бўляптими?
- Ҳозирча бирор бир клубдан аниқ таклиф олганим йўқ. Лекин таклиф бўлишига умид қиламан.  

- Ҳозирги спорт формангиз қай даражада? Яна супер-лигада ўйнашга тайёрмисиз?
- Тан оламан, айни дамда спорт формам юқори даражада эмас. Лекин ҳар куни ўз устимда ишлаб, идеал даражага чиқишга харакат қиляпман. Бугунги кунда оптимал формага кириб бориш учун Тошкентда “Оқ-тепа” жамоаси машғулотларида иштирок этяпман. Менимча ҳар бир футболчи супер-лигада ўйнашни хоҳлайди. Шу жумладан мен ҳам бу йил яна супер-лигада бўлишни истайман.