Тимур Кападзе Жасур Жалолиддинов ҳақида: "У ҳали терма жамоамизга ва футболимизга кўп фойда келтиради"

Иккита ўйинда иккита гол урган Жасур Жалолиддинов мусобақанинг энг яхши футболчиси деб топилди. Футболчи Озарбайжон ва Украина жамоалари дарвозасини ишғол қилди. Сўнгги пайтларда қийин кунларни бошидан кечираётган иқтидорли ярим ҳимоячининг секин-аста спорт формасига қайтаётгани қувонарли ҳолат албатта. Биз Жалолиддиновнинг ҳолати бўйича Ўзбекистон U-21 терма жамоаси бош мураббийи Тимур Кападзе фикрларини билдириб ўтди. 

"Жасурни салоҳияти юқори. Иқтидори бор. Спорт формаси ҳам анча яхши ҳолатга келмоқда. Муҳими ўзига бўлган ишончи қайтаётгани. Бу албатта яхши. Ўйлайманки, ҳамма нарса ўзининг қўлида. Тўхтаб қолмасдан ишлашда давом этиши керак. Қанчалик иқтидорли бўлмасин, ўз устида профессионал тарзда ишламаса ортда қолиб кетади. Жасур буни яхши тушуниб турибди. Тўғри қийинчиликларга дуч келди. "Локомотив"да ўйин амалиётисиз қолиб кетди. Ҳозирда "Андижон"да тўп тепиб ҳолатини яхшиламоқда. У ҳали келажакда терма жамоамизга ва футболимизга кўп фойда келтира олади",- дейди Тимур Кападзе.