Темур Ҳакимов: "Менимча 2 ойдан кейин майдонга қайтсам керак"
02 фев 2017 16:53
Янгиликлар

Темур Ҳакимов: "Менимча 2 ойдан кейин майдонга қайтсам керак"

Ўзбекистон олимпия терма жамоаси собиқ ҳужумчиси Темур Ҳакимов куни кеча Москвада операция қилинди. Ҳужумчи билан боғланиб унинг аҳволи билан қизиқдик.

- Бу жароҳатни қачон олган эдингиз?
- Ўзбекистон олимпия терма жамоаси сафида Дубайдаги йиғинда олгандим. Бироқ оғриқларга чидаб ўйнаб юргандим.

- Нега айнан Москвада операция қилдиришга қарор қилдингиз?
- Аслида Германияга бормоқчи эдим. Бироқ Дилшод Раҳматуллаев ва Отабек Ҳайдаров каби футболчилар менга Москвани тавсия қилишди. Операцияни ўтказишда "Оқ-тепа" жамоаси раҳбари Ғанишер Шоғуломов ҳамда "Оқ-тепа" жамоаси бошлиғи Владимир Гаврилов молиявий томондан ёрдам беришди. Шу инсонлар барча сарф-харажатларни кўтаришди. Уларга чуқур миннатдорчилигимми билдираман.

- Операция қандай ўтди?
- Яхши бўлди барчаси. 2 соатдан ортиқроқ операция қилишди. Ҳозир анча яхшиман ва юришни ҳам бошладим.

- Ҳозир аҳволингиз қандай?
- Айтганимдек барчаси яхши. Ўзимни яхши ҳис қилаяпман, оғриқлар аста секин камаймоқда.

- Тикланиш жараёни қанча ойни талаб қилади?
- Менимча 2 ойдан кейин умумий гуруҳда шуғуллансам керак.

- Темур Ҳакимов мавсумнинг биринчи қисмини ўтказиб юборадими?
- Йўқ. Агар тикланиш жараёни яхши кечса дастлабки 4та турдан сўнг майдонга тушишга тайёр бўламан. Умид қиламанки биринчи даврада ўйнайман.

- Айни пайтда эркин агентсиз. Мавсумни қайси клубда бошлайсиз?
- Ҳозирча мавсумни қайси жамоада бошлашим номаълум.

- Фаолиятингизни қайси жамоада давом эттиришингизга қачон ойдинлик киритасиз?
- Тошкентга боришим билан.

- Москвадан қачон қайтасиз?
- Худо хоҳласа 5 февраль, якшанба куни Тошкентда бўламан.