Суперлигада 2019 йилнинг энг чиройли голи муаллифи Музаффар Музаффаров 25 ёшга тўлди

2016 йилги мавсумнинг кашфиёт футболчиларидан бири, ўз вақтида Испаниянинг “Реал Мадрид” академиясида амалиёт ўтаган футболчи 25 ёшга тўлди. Ҳозирга қадар “Суғдиёна”, “Нефтчи”, АГМК, “Металлург” клубларида ҳаракат қилган футболчи қишки трансферлар вақтида “Қўқон-1912”га кўчиб ўтди. 

2018 йилда олмалиқликлар билан Ўзбекистон кубогида зафар қучди. Ўша мавсум иккинчи даврасида Виктор Кумиковнинг ўрнига тайинланган Бахтиёр Ашурматов жамоани соврин сари етаклаганди. Финалда эса кучли таркибга эга “Пахтакор” ишончли 3:1 ҳисобида таслим этилганди. Узоқдан кучли зарбалари билан кўп маротаба дарвозабонларга бош оғриқ бўлган футболчи бекободликлар сафида ҳам ўзини кўрсата олди. Музаффар 2019 йил ПФЛ талқинига кўра Суперлигада мавсумнинг энг чиройли голи муаллифи деб топилди.

Амалда эса терма жамоа мураббийи Вадим Абрамовнинг назарига тушди ва Саудия Арабистони ва Фаластинга қарши ўйинлар олдидан кенгайтирилган таркибга киритилди. Маълумот ўрнида айтиб ўтиш жоизки, Музаффаров . Маълумки Музаффар Музаффаров таниқли мураббий, “Пахтакор”, “Нефтчи” жамоаларида бош мураббий бўлиб ишлаган Мурод Исмоиловнинг ўғли ҳисобланади. Унинг акаси Ислом Исмоилов эса ҳозирда “Турон” жамоаси устози бўлиб ишламоқда.

Акрамжон Мамадалиев (“Қўқон-1912” жамоаси матбуот ва маркетинг бўлими бошлиғи): Мана 2015 йилдан бер ушбу жамоада ишлаб келаётган бўлсам жамоани шакллантираётган раҳбарлар ёки мураббийлар билан маслаҳатлашганимизда доим Музаффарни номи тилга олинарди. Охирги икки, уч йилда уни сафимизга қўшиб олишни иложи бўлмади. Мана, бу йил ниятимизга етдик. Қайси жамоа таркибида бизга қарши ўйнаган бўлса дарвозамизга жуда чиройли голларни урган. Энди мана шундай шедевр голларни жамоамиз либосида уриб мухлисларга завқ улашади деб ўйлаймиз. Музаффарга Қўқондаги фаолиятида омад тилайман ва барчани номидан табриклаб қоламан.

Қувондиқ Рўзиев (“Қўқон-1912” футболчиси): Жамоамизга янги келиб қўшилган Музаффар Музаффаровни туғилган куни билан табриклайман. Ишларига ривож ва омад тилаб қоламан. Уни қандай махоратга эгалигини биламиз. Иқтидорли ярим ҳимоячи жамоамизнинг муваффақиятларида ўзининг ҳиссасини қўшади деган умиддаман.

Абдулазиз Искандаров тайёрлади