Суперлига. Ҳасанов энг яхши ёхуд 21-тур лауреатлари
04 окт 2021 14:02
Янгиликлар

Суперлига. Ҳасанов энг яхши ёхуд 21-тур лауреатлари

Куни кеча Суперлиганинг 21-туридан ўрин олган ўйинлар якунланди.

Championat.asia тур баҳслари асосида тур лауреатларини аниқлади.

"Қўқон-1912" клуби бу тур ўз майдонида амалдаги "Пахтакор"га қарши ўйнади ва 4:2 ҳисобида ғалабага эришди. Қўқонликлар мавсумдаги энг чиройли ғалабаларидан бирини айнан шу турда қўлга киритишди ва 2003 йилдан буён илк бор "Пахтакор"ни таслим қилди. Шу боис Бахтиёр Ашурматов championat.asia сайти талқинига кўра 21-турнинг энг яхши мураббийи деб топилди.

"Локомотив" бу тур Бекободда "Металлург" меҳмони бўлди ва 2:1 ҳисобида ғалаба қозонди. "Темирйўлчилар" дарвозабон Абдумавлон Абдужалилов қизил карточка олиб майдонни тарк этди. Дарвозани Жавоҳир Илёсов эгаллади ва бир қатор сейвлар билан жамоаси жонига оро кирди. Айнан унинг сейви ва тўп узатишидан кейин "Локомотив" пенальти тепиш имкониятини қўлга киритди. Шу боис Championat.asia сайти талқинига кўра, 21-турнинг энг яхши дарвозабони Жавоҳир Илёсов бўлди.

Бу турда "Қизилқум" ҳужумчиси Элгужа Григалашвили "Турон" билан баҳсда ажойиб гол урди ва тур голи муаллифига айланди.

"Қўқон-1912" сафида "Пахтакор"га қарши баҳсда Муҳаммаданас Ҳасанов жуда фаол ўйнади. Битта гол уришдан ташқари битта голга ассистентлик қилди. Шу тариқа, Муҳаммаданас Ҳасанов championat.asia талқинига кўра 21-турнинг энг яхши футболчиси деб топилди.