Суперлига. "Динамо" посбони, "Пахтакор" устози, "Насаф" вакили ва "Қизилқум" тўпурари: 4-тур лауреатлари

Championat.asia тур баҳслари асосида тур лауреатларини аниқлади.

"Динамо" клуби бу турда Тошкентда "Бунёдкор" меҳмони бўлди ва 1:2 ҳисобида мағлуб бўлди. Гарчи мағлубиятга учраган бўлсада самарқандликлар посбони Милое Прековичга деярли эътироз бўлмади. Биринчи таймда рақиб футболчининг пенальтидан тепган тўпини қайтарган Прекович ўйин давомида бир қатор сейвлар намойиш этди. "Динамо" посбони Милое Прекович championat.asia сайти талқинига кўра 4-турнинг энг яхши дарвозабони деб топилди.

"Пахтакор" бу тур чемпионликка даъвогар бўлган "Навбаҳор" билан тўқнаш келди ва 1:0 ҳисобида ғалаба қозонди. "Шерлар" кучли таркибга эга бўлган "лочинлар"га қарши яхши ўйнади ва ижобий натижа қайд этишди. Шу боис Championat.asia сайти талқинига кўра, 4-турнинг энг яхши мураббийи Славче Войнески бўлди.

Бу турда "Насаф" ярим ҳимоячиси Суҳроб Нуруллоев "Локомотив" билан баҳсда ажойиб гол урди ва тур голи муаллифига айланди.  

Бу йил "Қизилқум"га келган сербиялик легионер Александар Станисавлевич жуда сермаҳсул ўйин намойиш этмоқда. Айниқса "Нефтчи" билан баҳсда у жуда фойдали ўйнади. Баҳснинг биринчи таймида Саша пенальтидан ҳисобни очди. Иккинчи тайм бошида унинг тўп узатишидан кейин Абдуҳолиқов гол урди. Орадан кўп ўтмай Станисавлевич рақиб жарима майдони ичида йиқитилди ва пенальтидан Абдуҳолиқов фойдаланди. Шу тариқа, Александар Станисавлевич championat.asia талқинига кўра 4-турнинг энг яхши футболчиси деб топилди. Маълумот учун, футболчи 4та турда 3та гол урди ва 1та пас ҳамда 2та пенальти ишлади.

Ўзбекистон чемпионати турнир жадвали >>>>> Суперлига