«Сирож Самарқанд сен билан» хайрия акцияси ўтказилди
16 апр 2017 14:35
Янгиликлар

«Сирож Самарқанд сен билан» хайрия акцияси ўтказилди

Теглар : Сирожиддин Сайфиев #ТаслимБўлмаСирож Динамо

«Динамо» клуби собиқ футболчиси 35 ёшли Сирожиддин Сайфиев саратон (Рак) касаллигига чалингани эълон қилингач, айни вақтда уни қўллаб-қувватлаш учун #ТаслимБўлмаСирож акцияси эълон қилинган.

15 апрель, шанба куни 6-тур доирасидаги «Динамо» - «Бухоро» ўйинида ҳам «Динамо» стадионида «Сирож Самарқанд сен билан» хайрия акцияси ўтказилди. Шу куни ўйингоҳ дарвозаси олдида қутилар ташкил этилган эди.

Шу куни «Динамо» ва «Бухоро» жамоалари ҳам футболчини қўллаб-қувватлаб, #BizSenBilanSiroj ёзуви остидаги футболкаларда майдонга тушиб келишди.

Футболчилик фаолияти давомида самарқандлик минглаб мухлисларни ўз ўйинлари билан хурсанд этган Сирожиддин Сайфиевнинг бугунги тақдири «Динамо» жамоасининг ҳеч бир ишқибозини беэътибор қолдирмади.

«Динамо» - «Бухоро» (3:1) учрашуви якунлангач, мухлислар фаоли Шавкат Бурҳонов, «Динамо» стадиони ҳисобчиси Юлия Лагутина ва «Динамо» клуби матбуот котиби Усмон Ибодов иштирокида комиссия тузилиб, холис мухлислар кўз ўнгида йиғилган 4 038 000 (тўрт миллион ўттиз саккиз минг) сўм пул стадионнинг ўзида Сирожиддин Сайфиевнинг отаси Шамсиддин ака Сайфиевга топширилди. Ўз ўрнида Шамсиддин ака ҳам барчага ўз миннатдорчилигини билдирди.

Халқимизнинг бундай ғамхўрлиги ва энг асосийси эътибордан киши дили кўтарилади. Шу ўринда Сирожидин Сайфиевга Худодан шифо тилаб қоламиз. Биз сен билан Сирож!