Шота Арвеладзе: "ОЧЛда қатнашиш учун Қатарга қандай ҳолатда борамиз, ҳозирча номаълум. Сидиқов ҳали ўз даражасини кўрсатади"

"Авваламбор, шифокорларимизга катта раҳмат айтмоқчиман. Охирги бир ярим ой биз учун даҳшатли ўтди, раҳбариятга ҳам раҳмат. Улар вирус билан боғлиқ жиддий муаммоларимизга тезда чора кўришди. Бу очко тўплаш эмас, бу соғлиқ, бу ҳаёт. Барчани футбол қайтгани билан табриклайман. Биринчи ўйинни ўтказдик. Албатта, тайёрланиш жараёни қийин ўтди, тахминан 17 киши касалланганди. Кимдирда вируснинг енгил формаси, кимдирда бир оз оғирроқ формаси кузатилди. Ғалаба билан ҳам, касалликни енгиб ўтишгани билан ҳам йигитларни табриклайман. Улар бугун чиройли ўйин кўрсатишди ва муносиб ғалабага эришдилар. Умид қиламанки, кейинги ҳаётимиз тўхтаб қолмайди ва барчаси яхши бўлади. Нафақат футболчилар, уларнинг оиласи, барча мухлислар соғ бўлишсин", - дейди Арвеладзе.

"Пахтакор"да тақвим тиғиз. Олдинда Чемпионлар Лигаси ҳам бор. Жамоага ротация керак. Бундан ташқари, кўп футболчилар касал бўлиб қолган, айримлари яхши формада эмас. Вазиятдан қандай қилиб чиқиб кетмоқчисиз?
- Ҳар 3 кунда вазиятга қараймиз. Кимдир ўзини яхши ҳис этмаса, бунга чора кўрамиз. Ҳозир ҳаммаси яхши, бугун 5 та ўзгаришга қўл урдик. Умид қиламизки, ҳаммаси яхши бўлади. Қатарга қандай ҳолатда борамиз, ҳозирча номаълум. Бизни олдинда "Насаф", "Локомотив" ва "Андижон"га қарши 3 та қийин ўйин кутяпти.

Жавоҳир Сидиқовнинг ҳолати қандай? У нега ўйнамаяпти? Айниқса, у қўқонлик ишқибозларнинг ёқимтойи.
- Уни барча ёқтиради.  Сидиқов оғир жароҳатидан 1,5-2 ой олдин тузалди ва охиригача тикланди.  Ҳали унинг вақти келади ва ўз даражасини кўрсатади.