"Шўртан"нинг логотипи янгиланди

Замон шиддат билан ўзгармоқда. Ҳар жабҳада ривожланиш, янгиланиш ва олдинга интилиш жараёнлари кузатилмоқда. Бу ҳолатни футбол соҳасида ҳам кўришимиз мумкин. Айнан шу нуқтаи-назардан олиб қараганда, бундай ижобий ўзгаришларни “Оқ бўрилар” жамоасида ҳам сезишимиз мумкин.

Логотип юнонча - логос сўзидан олинган бўлиб, рамз, белги маъноларини билдиради. Унинг замирида бирор бир корхона, ташкилот ёки уюшманинг тарихи, анъаналари акс эттирилади.

“Шўртан” жамоасининг янги талқиндаги рамзида ҳам ана шу нозик жиҳатлар эътиборга олинган. Логотипнинг пастки томонида клубнинг ўткир кўк ранги ўрин олган. Унинг фонида ҳар қандай кишининг ҳам диққатини ўзига тортадиган оқ бўрининг расми туширилган. Бўри - айнан “Шўртан” жамоасининг лақаби эканлигини маълум. Бўрилар табиатда йиртқич ҳайвонлар туркумига киради. Аммо логотипда ўрин олган бўри - курашдан қочмайдиган, узоқни кўра биладиган ақилли ва кучли жонивор тимсолида гавдалантирилган.

Ўртада футбол тўпи ва унинг икки ён томонида "Шўртан” ПФКнинг раман ташкил топган 1994 йил санаси ёзиб қўйилган.

Юқори қисмда эса лотинча SHFC (яъни Шўртан Футбол Клуби), деган  сўз ёзилган.