Шавкат Саидов: "Локомотив"ни ғалаба ва чемпионлик билан табриклаймиз"

Шавкат Саидов, “Металлург” ФК жамоа бошлиғи: - Аввало, “Локомотив”ни муддатидан олдин чемпионликка эришганлиги билан табриклайман. Бизга қарши ўйиндан бир кун муқаддам темирйўлчиларнинг чемпион бўлганлиги ҳақидаги хабар назаримда ўйиннинг шиддатли ўтишига бироз салбий таъсир кўрсатди. Мезбонларга қараганда ҳам бизнинг футболчиларимизда “курашиш иштиёқи” пасайганлиги сезилди. Янги чемпионга қарши 20 дақиқа жиддий рақобат кўрсатишга кучимиз етди. Кетма кет ўтказиб юборилган голлар эса ўйинчиларимизнинг ўз кучларига бўлган ишончларини сўндирди. “Локомотив” бу йил мавсумни жуда кўтаринки тарзда, чемпионга хос ва мос тарзда ўтказди. Жамоада тенг кучли иккита таркиб мавжуд. Заҳиранинг кучлилиги боис барча рақибларидан устун эканлиги сезилиб турди. Темирйўлчиларга энди халқаро майдонларда ҳам юртимиз шарафини муносиб ҳимоя этишларини тилаб қоламиз.

Биз учун эса мавсум ҳали якунлангани йўқ. Кейинги ўйинга, ўз уйимиздаги охирги учрашувга тайёргарликни бошлаймиз. Муваффақиятли ўтган мавсумни ишқибозларимиз қаршисида ғалаба билан якунлашни хоҳлаймиз, дейди Шавкат Саидов.

"Металлург" матбуот хизмати