«Бунёдкор»нинг таркиби жуда ёш деган эртакларни йиғиштириш керак» — Шаҳбоз Беғамов

У ўзининг телеграммдаги каналида шундай ёзди:

«Бунёдкор» жуда ёш таркиби билан зўр ўйнапти»

Йўғе? Ҳа, бўмасамчи!?

Абдумавлон Абдужалилов ҳалиям ёшку, энди 26 ёшга тўлади. Дилшод Аҳмадалиев ҳам ёш, эндигина 7 йил бўлди катта футболга кирганига ва ҳали тажриба тўпламаган бўлса ҳам керак.

Мурод Холмуҳаммедов (29 ёш), Анвар Ғофуров (37 ёш), ҒуломҲайдар Гулямов (28 ёш), Лутфулла Тўраев (31 ёш) ҳали тажриба тўплашмаган, пишмаган ёш иқтидорлар қаторида тилга олинаверади, шекилли. Сардор Абдураимов (24 ёш) ва Ҳумоюн Муртазоев (27 ёш) ҳам «ўтган йил» чиқиб порлаган ёш «қалдирғочлар» дейилса керак.

Қандай ёш таркиб? Абрамов «Бунёдкор» ёшларини ўйнатиб юрипти деган эртаклар тўқимачилари ўзбек футболини шунчаки номига билади.

Эртакларни йиғиштириш керак. Ёш, ёш, ёш деб 18-20 ёшли футболчиларни, бугунги таркибдаги Жасур Жалолиддинов, Суҳроб Иззатов ва Ҳасан Йўлдошевга нисбатан ишлатиш мумкин.

Ўтган йилги «Бунёдкор»нинг таркибига нисбатан ҳам ёш жамоа деган жумлани ишлатиш модага айланганди. Ваҳоланки ўшанда ҳозирда жамоадан кетган, МТЖда куйлак йиртган баъзи ветеран, тажрибали ва юқори маҳорат эгалари ва легионерлар бор эди — Зуҳуров (36 ёш), Гадоев (27 ёш), Турсунов (33 ёш) ва ҳоказо.

Ўтган мавсум ҳам, катта эҳтимол бу йил ҳам фақат битта жамоага нисбатан, яъни «Насаф»га қарата ёш жамоа дейиш тўғрироқ. Бердиев жамоаси ҳам нечинчи йил Суперлигада ўйнамоқда, етарли тажриба тўпланган ўрта ёш футболчилар. Фақат баъзи чизиқларга нисбатан етакчилар зарур бўлади. Баланс, яъни мувозанат учун.