Сенегал, Марокаш, Эрон, Уругвай. Шу кетишда йил якунига қадар яна бир топ жамоа Ўзбекистонга ҳам келади

Биринчи галда уларнинг ҳаммаси ЖЧ иштирокчилари, иккинчи томондан эса ФИФА рейтингида биздан олдинда: Уругвай (22), Сенегал (27), Эрон (33), Марокаш (42).

Ҳеч қачон Жаҳон Чемпионатига чиқа олмаган Ўзбекистон нима сабабдан уларни қизиқтириб қолди? Биз биламизки, Аргентина ва Бразилия каби термалар ўртоқлик ўйинлари учун умуман пул сарфламайди (деярли). Уларни ўзингиз олиб келасиз, едириб-ичириб, қайтишида чўнтагига пул ҳам солиб юборасиз. Бошқа илож йўқ. Шунинг учун ҳам бундай рақиблар билан қитъанинг Япония, Хитой каби термалари кўпроқ ўйнайди. Бир сўм сарфлаб, трансляция, мухлислар ва ҳомийлар орқали 3 сўм чиқариб олишади улар.

Ўзбекистон бундай қила олмайди. Бизда Бразилия билан ўйинимизни сотиб оладиган миллий телеканал йўқ, ҳомийлар сўроқ остида. Фақатгина мухлислар 100 доллардан чипта сотсангиз ҳам келиши мумкин. Чунки Ўзбекистонда Месси ёки Неймар иштирокидаги ўйинни “Бунёдкор”да кўриш учун 100 долларнинг баҳридан ўтмайдиган 35 минг одам бор, албатта. Балки ундан ҳам қимматроғига рози бўлар.

Ҳозир ЎФА ўз имиджини кўтариб олиш учун ҳам чиқимдан қочаётгани йўқ. Чунки миллий терма жамоа Туркия орқали Марокашга бориши, яшаши ва қайтиши, кейин Теҳронда бўлиши, ЖЧ арафасида ернинг бир жойида бўлган Уругвайга бирров ўтиб келишининг ўзиёқ яхшигина маблағни талаб қилади. Бу сафарларнинг унча катта бўлмаган бошқа харажатлари ҳам бўлса, ажабланмайман. Айтайлик, Сенегал билан нейтрал майдонда ўйнашимиз ёки Эронга рақиб бўлишимиз учун пул талаб этилмас. Аммо Уругвай ва Марокаш масаласи бироз бошқачароқ бўлса катта эҳтимол. Бу шундай чиқимки, ундан қочмаётганимизнинг ўзиёқ катта футбол сари биринчи қадамдир. Зеро ЎФФ бунга қадар асосан арзон шўрва қидирган бўлиб, ҳар сафар бизнинг харажатларимизни кўтариши мумкин бўлган Қатар, Уммон ёки ҳар доим лаббай деб жавоб бериши мумкин бўлган Иордания каби рақиблар билан ўйнаб юраверганди.

23 март, Сенегал

Сенегалга қарши ўйин варианти бироз кечроқ чиқди. Яъни, ЎФА бунгача Марокаш ва Эрон ҳақида бохабар қилиб улгурганди. Сенегалликлар ЖЧ гуруҳ босқичида Польша, Колумбия ҳамда Япония билан беллашиб кўради. Улар Польшага қарши тайёргарлик учун 27 март кунига Боснияга қарши ўйин келишиб улгуришганди. Беллашув Францияда ўтади. Бироқ март ойидаги ФИФА куни бемалол 2 та учрашув ўтказиш учун етади. Шундай экан, улар иложи борича яна 1 та рақиб излаш пайига тушган, аммо ҳақиқат шуки, кўпчиликда аллақачон келишувлар бор эди. 

Мана шундай бир вақтда агентлар катта роль ўйнайди. Улар Сенегал ФФга 27 март куни Ўзбекистон деган жамоа Марокашга келаётгани, агар қарши бўлинмаса, 23 мартга ўртоқлик ўйинини Касабланканинг ўзига гаплашиб бериши мумкинлигини айтади. Бундай иш билан шуғулланадиган юзлаб фирмалар бор. Сенегал ва Марокашнинг ораси унча узоқ эмас, демак, Босния билан ўйингача Ўзбекистон вариантида тўхталиш мумкин. Чунки ўзбекистонликлар ўша Польша, ўша Босния ўйин услубида ўйнашга ҳаракат қилади, бироқ даражаси бироз пастроқ, фойдадан ҳоли бўлмайди.

Имиджи ҳақида тинимсиз бош қотираётган Ўзбекистон икки марта рози бўлади. Таркибида АПЛ ва Европанинг бошқа машҳур клублари юлдузлари бўлган рақиб ажойиб вариант. Хуллас, ўртада агентлик бироз пул ишлаб олади. Айтмоқчи бўлганимиз, ЎФА мана шу каби харажат ҳамда Марокашдек мамлакатда бироз кўпроқ қолиш чиқимларидан қочмаяпти.

27 март, МарокашМарокашликлар мундиалда Португалия, Испания ҳамда Эрон билан кураш олиб боради. Улар 23 март санасига Сербия билан ўйин келишиб қўйишганди. Беллашув Туринда ўтади. Кейин эса тўрт кундан кейин ватанда Ўзбекистон термаси синовдан ўтказилади. Шунчаки пул учун эмас, Ўзбекистон деган жамоа форсларга қарши тайёргарликнинг бир қисмига кириб кетади. Ҳар икки жамоа саралашда ҳимоявий футболни биринчи ўйинга қўйгани, асосий мақсад сифатида гол ўтказиб юбормасликни белгилаб олгани-ю, олдинги чизиқдаги ижрочилардан бир нима кутгани маълум. Шунчаки бирини Кейруш бошқарганди, бошқасини Бабаян, фарқ шунда бўлди.

17 май, Эрон

Форслар ЖЧ стартига бўлган қадар режани ишлаб чиқиб улгурган. Бунда улар пулни ҳавога сочишни истамади ва ўз даражасидаги жамоалар билан куч синашишни афзал билди. Кейрушнинг мақсади Испания ёки Португалия билан ўйин стратегиясини ишлаб чиқиш эмас, жамоасини ўзи истаган кўринишга келтириб олиш бўлса ажаб эмас. Рақибларга эътибор беринг:

17 март: Серра-Леоне

23 март: Тунис

27 март: Жазоир 

11 май: Сурия

17 май: Ўзбекистон

28 май: Туркия

2 июнь: Греция

8 июнь: Литва

Эроннинг мундиалдаги рақиблари Марокаш, Испания ҳамда Португалия. Марокашга ўхшаш рақиблар режада бор, бироқ испанлар, португалларга ўхшашини топиш учун ё Уругвай билан ёки Бразилия билан келишиш керак. Кейруш ҳам, Эрон ФФ ҳам балки буни истамагандир. Мутахассис Португалия термасини беш қўлидек билади, Испанияни эса ҳамма билади. Шунчаки у бошқа йўлдан юришга қарор қилди. Сурия ва Ўзбекистонга қарши беллашувлар жамоа жипслиги учун керак, қолаверса, 1 йил ичида форслар ўйинида қанчалик ўзгариш борлигини синовдан ўтказиш учун ҳам муҳим. Чунки биз саралашда ўзаро ўйнадик.

7 июнь, Уругвай

Уругвайлик футболчилар мундиалга жўнаб кетиш олдидан ўз уйларида 2 та ўйин ўтказишади. 5 июнь куни улар Ганага қарши учрашувда иштирок этади. Табарес шогирдларининг ЖЧдаги рақиблари Россия, Миср ва Саудия Арабистони эканини биласиз. Менимча, ҳаммаси тушунарли. Ўртадаги агентлар Ўзбекистон термасини яхши реклама қила олган. 

Қанчалик инкор этмайлик, Россия ва Ўзбекистон футболи бир-бирига жуда ўхшаш. Уругвай ўша Россиянинг кучсизроқ вариантини синовдан ўтказади. Қолаверса, шарафли сафар олдидан кучсизроқ рақиб жуда қўл келади. Бу биринчидан футболчиларнинг жароҳатланиш имкониятларини нисбатан камайтиради, иккинчидан уларнинг кайфиятларини кўтаради. Ўзбекистон томони эса ўзи учун анча олис ўлган мамлакатга Уругвай билан ўйнаш учун етиб келишга тайёр, ёмонми?

Имиджни кўтариш учун пул керак. Бизда эса пул бор эканига ишонтириб улгуришди. Оддий турнирда зафар қучганлар Малибу оляпти, ҳайдовчилик гувоҳномаси йўқ ўсмир спортчиларда эса Спарк, мураббийларида Кобальт бор. ЎФА фақатгина пул бор демасдан, аввалги қарашларни, стереотипларни ўзгартирмоқчи. Ҳозирча шунисига ҳам шукр қилиб турса бўлади. Агар бутун 27 йиллик футболимиз тарихи ва ундаги ўртоқлик ўйинлари битта ўрганиб чиқилса, 2018 йил бу борада қанчалик ўсаётганимиз яққол кўринади. Қолаверса, ўша Иордания, ўша Баҳрайндан чарчаб кетган терманинг юлдуз футболчиларида ҳам иштиёқ, тасаввурлар ўзгаради. Чунки улар ҳам Уругвай ёки Сенегалга қарши ўйнаб кўришга қизиқиб қараши катта эҳтимол.