Саудия Арабистони термаси футболчилари Аргентина устидан қозонилган ғалабадан сўнг "Rolls-Royce" автомобиллари билан тақдирлангани йўқ

Саудия Арабистони ЖЧ-2022 гуруҳ босқичининг 1-турида Аргентинани 2:1 ҳисобида мағлуб этди.

Шундан сўнг саудиялик футболчиларга "Rolls-Royce Phantom" автомобили совға қилиниши ҳақида маълумот пайдо бўлди. Бу қарор Саудия Арабистони валиаҳд шаҳзодаси Муҳаммад бин Салмон томонидан қабул қилингани хабар қилинганди.

Бу маълумотни Саудия Арабистони футбол федерацияси президенти Ёсир Ал Мишал инкор қилди.

"Йўқ, йўқ, йўқ. Футболчиларимиз юрт номини ҳимоя қилиш учун ғурур билан ўйнашди. Тарихий ўйинда терма жамоа шарафини ҳимоя қилиш улар учун шараф ва бахт эди. Бу миш-мишлар ҳақиқатга тўғри келмайди. Албатта, уларда бонус бор эди, лекин бу одатий бонус эди. Бундай ҳолатлар учун бизда қоидалар мавжуд.

Улар бонуслар учун эмас, мамлакат учун ўйнашади. Тарих яратиш учун. Уларнинг кўпчилиги Аргентина устидан қозонилган ғалабадан сўнг машҳур бўлишди", – деди Ал Мишал.