Сардор Мирзаев жамоаси билан шартномаси муддатини узайтиргани хусусида нималар деди?

Мирзаев “Муангтонг Юнайтед” шарафини ҳимоя қилмоқда. Яқинда ҳамюртимиз ушбу клуб билан амалдаги шартномаси муддатини 2023 йига қадар узайтирди. Шартномани узайтириш борасида ўз фикрларини билдириб ўтди.

- Менда бошқа жамоалардан ҳам таклиф бўлганди. Аммо “Муангтонг Юнайтед” раҳбарияти мен билан шартномани узайтирмоқчи эканини ва барча шароитларни яхшилаб беришини маълум қилди. Шундан сўнг музокаралар ўтказдик ва 2023 йилнинг ёзига қадар мўжалланган шартнома имзоладик.

Тўғриси, 2-3та жамоалардан яхши таклифлар тушди. Жумладан, ўтган йилги Таиланд чемпионлигини қўлга киритган жамоадан ҳам чақирув бўлганди. “Муантонг Юнайтед”да қолишимга сабаб, бу ердаги муҳитга энди мослашиб олгандим. Шу жиҳатлари сабабли жамоада қолишни афзал билдим. Раҳбарият ва мураббийлар ҳам менга катта ишонч билдирмоқда. 

Таиланд футболини танлаганимга асосий сабаблардан бири яхши даромад топиш эди. Буни яшириб ўтирмайман. Таиландда кўпроқ маблағга эга бўлиш мумкин. Футболчининг фаолияти узоқ эмас. Келажагимизни яхшилаб олишимиз лозим. Ўзбекистонга қайтишим ҳам мумкин эди. Ҳар ҳолда ўзимизнинг жамоалардан ҳам таклифлар йўқ эмасди. Таиландда футболга катта эътибор қаратилаётгани сезилиб турибди. Барча клубларда молиявий имкониятлар юқори ҳисобланади. Айнан шу томонларини ҳисобга олиб, шартномам муддатини узайтиришга қарор қилдим.