Санжар Қувватов: "Гуруҳдаги рақибларимиз кучли эди"

Ушбу баҳсдан сўнг "Насаф" жамоаси дарвозабони Санжар Қувватов ўз фикрларини билдириб ўтди.

"Кеча "Персеполис"га қарши учрашувда фақат ғалаба қозониш учун майдонга тушган эдик. Афсуски ўйинда нурсиз дуранг қайд этилди. "Персеполис" қаршига дуранг учун келгандек ўйин кўрсатди. Рақибларимиз ҳимояда бизга ҳеч қандай имконият қолдирмади. "Персеполис" дарвозасини ишғол қилиш учун бор кучимизни ишга солдик, лекин бизга бироз омад етишмади. Гуруҳдаги иккинчи ўйинда "Ал Садд" ғалаба қозонишини "Персеполис" яхши биларди. Шунинг учун ҳам улар бемалол вақтни чўзиб ўйнашди. "Ал Садд" ғалаба қозонса "Персеполис" кейинги босқичга йўл олиши 100 фоиз аниқ эди. 

Кечаги ўйиндаги рақибимиз ўзига керакли бўлган натижани қайд этди. Кейинги баҳсда қандай ҳисобда ғалаба қозонишимиздан қатъий назар, биз кейинги босқичга чиқа олмаймиз. Шундай бўлса ҳам фақат ғалаба қозониш учун, мухлисларимизни хурсанд қилиш учун майдонга чиқамиз. Сафарда биз Ўзбекистон шарафини ҳимоя қилиш учун тўп тепамиз. ОЧЛ мусобақасида гуруҳдаги рақибларимиз ҳам кучли эди, омад ҳам бизга кулиб боқмади. Ўз уйимизда мағлуб бўлмадик. Сафарда учралган мағлубиятлар бизга панд берди", - дейди Санжар Қувватов

Жаҳонгир Сотволдиев суҳбатлашди