Рўзимбой Аҳмедов: “Ўйиндан олдин ғалабага бўлган ишонч юқори эди”

 Ўтган мавсум дуранг қайд этган “Нефтчи”, бу йил уч очко билан қайтди. “Қалдирғочлар” дарвозасига киритилган ягона гол муаллифи Рўзимбой Аҳмедов учрашувдан сўнг сайтимизга қисқача интервью берди.

- Ўйин ҳақида нима дейишим мумкин? Ютдик, табиийки ғалаба қозонганимиздан хурсандмиз. Биласизми учрашувдан олдин бизда ғалабага бўлган ишонч юқори эди. Барча футболчилар уйга уч очко билан қайтиш ҳақида ўйлади. Рақибдан қолишмасдик. Таркибимиз ҳам бу йил етакчи ижрочилар билан кучайтирилди. Қолаверса Фарғонадан бизни қўллаб-қувватлаш учун кўплаб ишқибозлар борганди. Уларнинг далдаси ҳам бизни янада руҳлантирди ва ғалаба билан уларни хурсанд қилиш учун астойдил ҳаракат қилдик.

- Гарчи керакли натижани қўлга киритган бўлсакда, ғалабага осонликча эришилгани йўқ. Аҳиллик эвазига ютдик деб ўйлайман. Чунки ҳамма бир-бирини қўллаб-қувватлади. Худога шукур, айни дамда жамоада ички муҳит аъло даражада. Айнан ушбу жиҳатлар эвазига чемпионатда муваффақиятли иштирок этяпмиз.

- Пенальти? Тўғриси уни амалга ошириш учун мендан ташқари яна жамоада бир нечта футболчи бор. 11 метрлик тўпини ким тепиши муҳим эмас. Асосийси ундан аниқ фойдаланишдир. Шундай вазиятларда кимда ўзига бўлган ишончи юқори бўлса, ўша нуқтага яқинлашади. Яратганга шукур, мухлисларимиз олдида юзим ёруғ бўлиб, пенальтини аниқ амалга ошира олдим.

- Кўрган бўлсангиз менда яна бир қанча қулай вазиятлар бўлди. Лекин кўпична омад юз ўгирди. Кейинги ўйинларда ҳам голларим сонини оширишга харакат қиламан. Чунки ҳужумчини вазифаси гол уриш. Шунда ўз-ўзидан ғалабалар ҳам келаверади.

- Кейинги турда “Динамо”ни қабул қиламиз. Тўғри, “Бунёдкор”ни сафарда ютдик, лекин бу тарихда қолди. Энди асосий эътиборни бўлажак баҳсга қаратиш керак. Ҳозир осон ўйинларнинг ўзи йўқ. Ҳар бир баҳсда жиддий кураш бўлмоқда. Албатта 9 май куни бўлиб ўтдиган баҳсда ҳам ишқибозларимизни хурсанд қилишга уринамиз.

- Ҳақиқатдан ҳам бу йилги чемпионат “Нефтчи” учун омадли ўтмоқда. Лекин хулоса чиқаришга шошилмайлик. Юқорида айтиб ўтганимдек, бу йилги чемпионат ўзгача руҳда ўтмоқда. Кутилмаган натижалар қайд этилмоқда. Шунинг учун ҳам жамоаларнинг очколаридаги фарқ у қадар катта эмас. Бу эса чемпионатдаги интригани оширмоқда. Умид қиламанки, мавсум охирига қадар шу руҳ давом этади – дейди Рўзимбой Аҳмедов.


Исломбек Рустамбеков.