Роналду ва унинг 11та қизил карточкаси

Биз беш карра "Олтин тўп" соҳибининг барча қизил карточкаларини ёдга олишга қарор қилдик.

15 май 2004 йил. Англия премьер-лигаси. "Астон Вилла" – "Манчестер Юнайтед" – 0:2.
85-дақиқада четлатилган.
Сабаб: иккинчи сариқ карточка (симуляция + спортчиларга хос бўлмаган ҳаракат).
Дисквалификация: 1та ўйин

Роналду АПЛдаги дебют мавсуми охирида фаолиятидаги илк қизил карточкасини олганди. Португалиялик футболчи дастлаб 38-дақиқада симуляция учун сариқ олди, 85-дақиқада ҳисоб 2:0 бўлиб турган пайтда хуштакдан сўнг тўпни тепгани учун иккинчи бор огоҳлантирилиб, майдондан четлатилган. Ўша учрашувда Роналду ҳисобни очганди.

14 январь 2006 йил. Англия премьер-лигаси. "Манчестер Сити" – "Манчестер Юнайтед" – 3:1.
66-дақиқада четлатилган.
Сабаб: кескин қўполлик.
Дисквалификация: 3та ўйин

Манчестер дербисида Роналдуни "Сити" мухлислар тинмай ҳақорат қилишди, рақиб ҳимоячилари унинг оёғига роса тепишди. 66-дақиқада "Сити" 2:0 ҳисобида олдинда бораётган бир пайтда, ҳакам навбатдаги бор унга нисбатан ишлатилган қўполликни беэътибор қолдигач, рақиб оёғига қараб сакраганди. Якунда Роналду қизил карточка ва 3та ўйинлик дисквалификацияни қабул қилиб олган.


15 август 2007 йил. Англия премьер-лигаси. "Портсмут" – "Манчестер Юнайтед" – 1:1.
85-дақиқада четлатилган.
Сабаб: спортчиларга хос бўлмаган ҳаракат.
Дисквалификация: 2та ўйин

Дербидан бир ярим йил ўтгач воқеа такрорланди – Роналду яна асабларни жиловлай олмади. "Портсмут"га қарши ўйиннинг 85-дақиқасида ҳисоб 1:1 бўлиб турган пайтда, португалиялик бурчак тўпи вақтида ўзини хаддан ортиқ қўриқлаб юборган ҳимоячини туртиб юборди. Бу ҳаракати учун МЮ вакили иккита ўйинда иштирок этмаганди.

30 ноябрь 2008 йил. Англия премьер-лигаси. "Манчестер Сити" – "Манчестер Юнайтед" – 0:1.
68-дақиқада четлатилган.
Сабаб: иккинчи сариқ карточка (ҳужумни тўхтатиш + тўпни қўл билан ўйнаш).
Дисквалификация: 1та ўйин

Яна Манчестер дербиси – яна четлатиш. Бу сафар барчаси жуда ҳам ачинарли тарзда рўй берди: Биринчи сариқ карточкани Роналду одатий, рақиб ҳужумини узиш учун қилган кичик қўполлиги учун олган, иккинчи огоҳлантириш эса рақиб жарима майдони ичида тўпни қўли билан ўйнагани учун берилган... Ваҳоланки ўша пайтда унинг жамоаси 1:0 ҳисобида олдинда бораётганди.

5 декабрь 2009 йил. Испания чемпионати. "Реал" – "Альмерия" – 4:2.
87-дақиқада четлатилган
Сабаб: иккинчи сариқ карточка (спортчиларга хос бўлмаган ҳаракат + қўполлик).
Дисквалификация: 1та ўйин

Испанияга кўчиб ўтган португалиялик илк қизил карточкасини ярим йил бўлмасдан олганди. "Альмерия"га қарши ўйин охири Роналду учун жуда ҳам ғалати ўтган. 82-дақиқада у пенальтидан гол ура олмайди, 85-дақиқада гол уриб уни жуда ҳам кўп нишонлагани учун сариқ карточка олган, 88-дақиқада майдондан четлатилди. "Альмерия" ҳимоячиси уни хаддан ташқари кескин тарзда қўриқлагани учун Криштиану унинг оёғига зарба беришга қарор қилганди.



24 январь 2010 йил. Испания чемпионати. "Реал" – "Малага" – 2:0.
70-дақиқада четлатилган.
Сабаб: Кескин қўполлик
Дисквалификация: 2та ўйин

Икки ой ўтар-ўтмас Роналду яна "ўзини кўрсатди". "Малага" ҳимоячиси ҳужум вақтида ўйинда дублга эришган португалияликнинг футболкасига худди кучук каби ёпишиб олди, бунга жавобан Роналду рақиб юзига зарба берди. Навбатдаги жанжал ва иккита ўйинлик дисквалификация.


17 май 2013 йил. Испания кубоги. "Реал" – "Атлетико" – 1:2 (қўшимча тайм).
115-дақиқада четлатилган.
Сабаб: кескин қўполлик
Дисквалификация: 1та ўйин

"Малага"га қарши ўйиндан сўнг Роналду уч йил умуман қизил карточка олмади. Аммо Мадрид дербисида ўзини тутиб тура олмади. Балки ўша вазиятда Габи симуляция қилганди, аммо португалиялик футболчининг бутсаси рақибнинг бурнини узиб юборай дегани рост.

2 февраль 2014 йил. Испания чемпионати. "Атлетик" – "Реал" – 1:1.
75-дақиқада четлатилган
Сабаб: спортчиларга хос бўлмаган ҳаракат
Дисквалификация: 3та ўйин

"Атлетик" билан ўйинда баск ҳимоячиларидан бири Бенземани йиқитди, Роналду барча футболчилар тўпланиб турган пайтда негадир Гурпегининг юзига қўли билан тегди. "Атлетик" вакили албатта ўзини ўлаётганга солиб ерга қулади, аммо ҳакамда қизил кўрсатиш учун етарлича сабаб бор эди


24 январь 2015 йил. Испания чемпионати. "Кордова" – "Реал" – 1:2.
83-дақиқада четлатилган
Сабаб: спортчиларга хос бўлмаган ҳаракат
Дисквалификация: 2та ўйин

2015 йил бошида "Кордоба"га қарши ўйин охири, ҳисоб 1:1, Роналду рақиби вакили Эдимарнинг оёғига тепди ва Хосе Креспонинг юзига зарба берди. Криштиану четлатилди, "Реал" якунда Бэйлнинг голи туфайли ғалаба қозониб кетди.


14 август 2017 йил. Испания Суперкубоги. "Барселона" – "Реал" – 1:3.
72-дақиқада четлатилган
Сабаб: иккинчи сариқ карточка (формасини ечгани учун + симуляция).
Дисквалификация: 5та ўйин

Роналду "Реал" сафидаги охирги қизил карточкасини "Барселона"га қарши Испания Суперкубоги доирасига олган. Зидан уни асосий таркибга киритмаган ва ҳисоб 58-дақиқада захирадан майдонга туширган. 80-дақиқада Роналду тезкор қарши ҳужумни чиройли гол билан якунлаб жамоасини 2:1 ҳисобида олдинга олиб чиқди ва голини футболкасини ечиб нишонлади. Ҳакам унга сариқ карточка кўрсатди. Орадан икки дақиқа ўтгач, КР7 рақиб жарима майдони ичида йиқилди ва пенальти талаб қилди, ҳакам эса...симуляция учун иккинчи сариқни кўрсатиб, Роналдуни четлатди. Унинг қарорига қўшилмаган ҳужумчи ҳакамни туриб майдондан чиқиб кетди. Шу боис унга 5та ўйинлик дисквалификация тайинланди. 

19 сентябрь 2018 йил. Европа чемпионлар лигаси. "Валенсия" – "Ювентус" – 0:2.
29-дақиқада четлатилган
Сабаб: спортчиларга хос бўлмаган ҳаракат
Дисквалификация: ҳозирча номаълум

Туриннинг "Ювентус" клубига кўчиб ўтган Роналду ушбу жамоа сафида гол уришни 3та ўйин кутди. "Кекса Синьора" сафида ўзи учун севимли бўлиб қолган Чемпионлар лигасидаги дебютида Испанияга сафар қилган португалиялик футболчи биринчи таймнинг ўрталарида рақиб вакили Жейсон Мурильонинг сочини ушлаб олгани учун бош ҳакам Феликс Брих уни майдондан ҳайдади. Ҳозирча у нечта ўйинни томошабинлар қаторида кузатиши маълум қилинмади. Роналду ЕЧЛдаги ўзининг 154-учрашувида биринчи бор қизил олди.

Хориж сайтлари асосида Нарзулла Сайдуллаев тайёрлади