"Рома"да бош мураббий ўзгарди. Рим клубидаги энг яхши мавсумини ўтказган Шомуродовнинг тақдири қандай кечади?

"Рома"нинг ўтган мавсуми худди драммага тўла сериалдек бўлди. "Рома" мавсумни Даниеле Де Росси қўл остида бошлади. Бироқ мураббий жамоа раҳбарияти билан рўй берган келишмовчиликдан сўнг клубни сентябрь ойидаёқ тарк этди. Унинг ўрнини эса хорватиялик Иван Юрич эгаллади, аммо мутахассис Рим клубида бор-йўғи 53 кун ишлади. Икки мавсум аввал мураббийлик фаолиятини якунлашини эълон қилган Клаудио Раньери "Рома"ни қутқаришга рози бўлди ва ноябрь ойидан бошлаб яна мураббийлик фаолиятига қайтди. Римликлар мавсумнинг дастлабки 16 учрашувида 8 маротаба мағлуб бўлишди. Бундай ёмон натижа 1973/1974 йилги мавсумдан бери қайд этилмаётган эди. Яъни "Жаллоросси" ўтган мавсумда ярим асрдан буён қайд этилмаётган салбий натижа билан бошлади. Бироқ Раньери келиши билан барчаси ўзгариб кетди. "Рома" Раньери қўл остида жами 36та учрашувда иштирок этди ва уларнинг йигирма иккитасида ғалаба қозонди, етти учрашувда дуранг қайд этди ва етти маротаба мағлуб бўлди. Декабрь ойида мусобақа жадвалининг ўртасида борган римликлар, мавсум якунида 69 очко тўплаб, мусобақа жадвалининг бешинчи ўрнини банд этишди. ЕЧЛ йўлланмасини қўлга киритган "Ювентус" эса бор-йўғи бир очко кўпроқ тўплаган эди.

Ҳамюртимиз Элдор Шомуродов ҳам мавсумни бир текисда ўтказа олмади, аммо Элдорга боғлиқ бўлмаган бир нечта сабаблар унинг намойиш этган ўйинига таъсир ўтказди. Шомуродов 24/25 мавсумдаги илк голини А Сериянинг 2-туридан ўрин олган "Эмполи"га баҳсда киритган эди. Захирадан ўйинга қўшилган ҳужумчимиз 80-дақиқада рақиб дарвозасини ишғол этган эди, аммо ушбу гол "Рома"ни мағлубиятдан қутқариб қолмаганди. Якунда "Эмполи" 1:2 ҳисобида ғалаба қозонганди.

А Сериянинг тўртинчи турига келиб, "Рома" бор-йўғи 3 очко жамғарган эди. Салбий натижалар ва жамоа бош директори Лина Сулука билан юзага келган можаро туфайли Де Росси истеъфога чиқарилди. 18 сентябрь санасида эса Иван Юрич "Рома" бош мураббийи этиб тайинланди. Айнан Юричнинг жамоага келиши Шомуродов захирага ўриндиғига михланиб қолишига сабаб бўлди. Шомуродов Иван Юрич қўл остидаги 12та учрашувнинг 5тасида захирада қолдирди ва жами 215 дақиқа майдонда ҳаракатланди(1080 жами дақиқа). Ноябрь ойида жамоани қабул қилиб олган "эски таниш" Раньери ҳам дар хол Элдорга ишонч билдирмади. Ноябрь ойида ўтказилган "Наполи"га қарши ўйинда Элдор кичик жароҳат олди. Шунингдек, декабрь ойида эса кетма-кет тўрт ўйинда захирада қолдирилди. Фақатгина 21-турга келибоқ, Шомуродов мунтазам ўйин амалиётига бўла бошлади ва мавсум якунига қадар ҳужум чизиғидаги энг муҳим футболчилардан бирига айланди.

"Элдор бизнинг жамоамиз учун жуда муҳим, у бажараётган иш ҳажми ва бераётган ҳиссаси билан фундаментал аҳамиятга эга. У ўзида бор ҳамма нарсани соатига 100 миль тезликда жамоага беради. Ҳар доим бор кучини ишга солади. У биз учун ҳақиқий соф олтин, мен уни жуда яхши кўраман" - дея айтиб ўтган эди Клаудио Раньери апрель ойидаги матбуот анжуманларидан бирида.

Шомуродовнинг қанчалик катта ўсишга эришганини яхшироқ тасаввур қилишингиз учун қуйидаги фактни келтирамиз: апрель ойидаги матбуот анжуманларида у Довбик билан биринчи дақиқалардан бирга ўйнай оладими, деган савол одатий ҳолга айланиб қолди. Италиялик журналистлар бундай ўйинчининг захирада ўтиришини тасаввур ҳам қила олмасликларини айтишди. Сўнгги олти турда эса Шомуродов учрашувни дастлабки дақиқаларданоқ бошлади.

Терма жамоамиз сардори 24/25 мавсумда барча мусобақаларда 37та учрашувда иштирок этиб, 7та гол ва 5та голли узатма қайд этди. Шомуродов майдондаги ҳар 131 дақиқада гол ёки ассист қайд этди. Шунингдек, ҳамюртимиз февраль ва апрель ойладира "Рома"нинг энг яхши футболчиси дея тан олинди.

"Рома"даги янги давр

"Рома" 6 июнь санасида италиялик мутахассис Жан Пьеро Гасперини билан уч йиллик шартнома имзолаганини эълон қилди. Гасперини бунга қадар "Аталанта"ни 2016 йилдан буён бошқариб келаётган эди. Мутахассис "Аталанта" билан бирга 23/24 мавсумда Европа Лигасини қўлга киритганди.

"Дастлабки таассуротлар жуда яхши. Бу мен учун катта чақирув, менга айнан шундай чақирувлар керак. Бу ерга катта иштиёқ билан келяпман. Бу эса мен кутган адреналин бўлади.

Асосий вазифа - мухлисларни ўзимизга жалб қилиш. Менинг жамоаларим доимо ўзгача кўринишда бўлишган: интенсив ва сифатли, доимо кўплаб голлар уришган. Биз доимо кўпроқ гол уриб, камроқ ўтказиб юборишни ўйлаймиз. Бу услубни Римда ҳам синаб кўрмоқчиман", - дея фикр билдирди 67 ёшлик мураббий шартнома имзолангандан сўнг.

Гасперинининг "Рома" бош мураббийи этиб тайинланиши оддий кадрлар алмашинуви эмас. Бу жамоа ривожланиш стратегияси ўзгарганини англатади. Гасперинининг услуби клубдан нафақат вақт, балки сабр-тоқат ҳам талаб қилади. У Антонио Конте сингари тезкор натижа берадиган мураббий эмас. Унинг тизими узоқ вақт давомида шаклланади ва фақат барқарор муҳитда ўз самарасини бера бошлайди. "Рома"ни эса ўтган мавсумнинг ўзидаёқ учта мураббий бошқарди.

Мисол учун, Гасперини "Аталанта"да фақат саккизинчи мавсумда биринчи совринни қўлга киритди, бироқ айнан унинг раҳбарлигида Бергамо клуби Чемпионлар Лигасининг доимий иштирокчисига айланди. "Рома"да совринларга йўл қисқароқ бўлса керак. Сабаби инфратузилма, ресурслар ва таркиб "Аталанта" билан солиштирганда тезроқ натижага эришишга ёрдам беради. Трансферлар масаласида "Рома"нинг "қўли" "Аталанта"никидан анча узунроқ. Селекция масаласидаги кенгроқ имкониятлар Гасперини ўз футболини йўлга қўйиш учун яхши имконият яратиб беради.

Гасперинига трансферлар ва ўз ғояларини амалга ошириш учун тўлиқ эркинлик берилади. Асосий талаб ва сўров эса вақт бўлади. "Рома" раҳбарияти сабрсизлиги билан танилган. "Жаллоросси" раҳбарияти кўп кутишни ёқтиришмайди, тизимли ёндашув эса ҳар доим ҳам тўғри билан қабул қилинмайди. Янги фалсафа кутилганидек эканлигига барчани ишонтириш Гасперинининг ўзи учун ҳам асосий синов ва чақирув бўлса керак.

Тактик ва Шомуродовга таъсир

3-4-2-1 схемаси Гасперини номи билан чамбарчас боғлиқ. У юқори интенсивлик, вертикал ҳужумлар ва қанот ҳимоячиларининг ҳужумдаги фаол иштирокига катта эътибор қаратади. Гасперини жамоалари кўп ҳужум қилишади ва юқори прессинг қўллашади. "Рома" ҳам ўтган мавсумда ушбу тактик услубдан фойдаланди. Аммо барчаси биз ўйлагандек осон эмас. "Рома"да бу схема бироз бошқача ишлар эди. Қанотлардаги камроқ комбинациялар ва ҳужумкор учликка кўпроқ эркинлик берилган эди.

"Рома"нинг ҳозирги таркиби ўзгаришларга муҳтож. Римликларнинг марказий ҳимоясида барқарор уч нафар ўйинчи йўқ. "Борруссия"дан келган Матс Хуммельс барқарор мавсум ўтказа олмади. "Атлетико"дан келган Марио Эрмосо эса қишдаёқ "Байер"га ижарага берилди. Лекин вазият бунчалик ёмон эмас, 25 ёшли иқтидорли Эван Ндика ва Жанлукка Манчини бор. Икки ҳимоячи ҳам тўп билан яхши муомала қила олади ва кам жароҳат олади.

Ҳужум чизиғида эса Шомуродов ва Довбик бор. Украиналик ҳужумчи ўтган мавсумда жамоанинг энг яхши тўпурари бўлишига қарамай, тўпсиз кам ҳаракатланиши ва прессингда Шомуродовга қараганда сустроқ. Шомуродов эса тўпсиз ҳам кўп ҳажмли ишни бажара олиши ва самарали прессинг қила олиши "Рома" янги бош мураббийига қўл келиши мумкин.

Гасперини зоналарга очилиш ва прессингда самарали ҳаракат қила оладиган ҳаракатчан ҳужумчилардан фойдаланишни маъқул кўради. Шомуродов айнан шундай футболчи. Элдор марказий ҳужумчи позициясида ёки иккинчи ҳужумчи сифатида ҳам 3-4-1-2 тактикасида жамоага катта фойда келтириши мумкин.

Гасперини ўз футболчиларидан талаб қиладиган асосий жиҳатлардан бири - кучли жисмоний тайёргарлик. Шомуродов янги мураббийнинг жисмоний ва тактик талабларига мос келишини исботлаб бериши керак бўлади.

Италиянинг Calcio in Pillole нашри маълум қилишича, римликларнинг янги устози 27 ёшли украиналик ҳужумчига ишонч билдирмаяпти. Таъкидланишича, мураббий ҳужум чизиғи футболчиларидан кўпроқ ҳаракатчанлик ва прессингда фаолликни истайди.

Зейтуллаев ушбу ҳолат бўйича қандай фикрда

"Бунёдкор" бош мураббийи ва Гасперини қўл остида ўйнаган собиқ футболчи Илёс Зейтуллаев ушбу вазият ҳақида фикр билдириб ўтди:

"Элдор Гасперини қўл остида жуда яхши имкониятларга эга бўлади. Мен Гасперини раҳбарлигида беш йил ўйнаганман ва шуни айта оламанки, Гасперини Элдор каби ўйинчиларни ёқтиради. У меҳнаткаш футболчиларга симпатия билдиради. Элдор кам гапириб, йирик ҳажмдаги ишни бажарадиган футболчилардан. "Рома"нинг аниқ режаларини билмасам-да, Элдорнинг янги мураббий билан янги даражага чиқиш учун жуда яхши имконияти бор деб ўйлайман. У ҳозир ҳам жуда яхши формада" - деди "Бунёдкор" бош мураббийи Илёс Зейтуллаев Гасперинининг "Рома"га тайинланиши ҳақида.

P.S Ушбу мақола Шомуродовнинг эҳтимолий трансфери, Туркия ва АҚШ клублари томонидан билдирилаётган қизиқиш эътиборга олинмаган.