Равшан Ҳайдаров: «Динамо»да ёшлардан иборат пойдевор борлиги хурсанд қилади»

- Мухлисларига ниҳоят кутилган ғалабани тақдим этдик, дея оламан. Шогирдларимнинг бугунги ҳаракатларидан кўнглим тўлди. “Навбаҳор” анча шакилланган жамоалардан биридир. Уларга қарши ўйнаш бизга доим қийинчилик туғдирган. Шогирдларим ўйин мобайнида тўпни назорат қилиб туришди. Иссиқ ҳавода футбол ўйнашни ўзи бўлмайди. Болалар бугунги ўйинда ютишлари кераклигини ҳис этган ҳолда бор кучларини бериб ўйнашди. Натижада биз ўз ҳисобимизга уч очкони қўшиб қўйдик.

- Ўзбекистон ёшлар терма жамоасига мураббий этиб тайинландингиз, айтингчи, “Динамо” вакилларини ҳам биз ушбу терма таркибида кўришимиз мумкинми?

- Бир-икки футболчиларни кўз остимга олиб қўйганман, насиб бўлса, уларни йиғинларга чақириб бораман.

- «Динамо»нинг биринчи даврадаги ўйинларидан кўнглингиз тўлдими?

- Тўғрисини айтадиган бўлсам, кўнглим тўлмади. Турнир жадвалидаги ўрнимиз ҳам буни кўрсатиб турибди. Биз бирин-кетин кучли тўртликдаги клублар билан ўйинлар ўтказдик, ўртамиёна клублар учун бу анча қийин. Бир қатор футболчиларимизнинг кутилмаганда жароҳатлар олишлари ҳам натижаларга катта таъсир ўтказмай қолмади. “Қизилқум” ва “Машъал”га қарши ўйинларда имкониятни бой бериб қўйдик. Давра боши ва охирида яхши ўйин кўрсатдик, ўртада эса айниқса «Пахтакор»га қарши ўйиндан кейин руҳий пасайиш сезилди жамоада. Бу эса натижамизга таъсир этди. Энг асосийси эса, «Динамо»да ёшлардан иборат пойдевор борлиги мени хурсанд қилади.

- Самарқанддаги фаолиятингиз ўз якунига етдими? Ўзбекистон ёшлар терма жамоаси билан бир вақтда “Динамо”да ишламоқчимисиз?

- Ҳали бу борада на раҳбарият, на ЎФФ билан гаплашганим йўқ. Шу сабабли бу саволингизга жавоб бера олмайман. Чунки, расмий ишлар ҳал бўлганидан кейин барчаси ҳақида бемалол гапириш мумкин.