Равшан Дўрмонов: "Сурхон" келаси йил биринчи лигада ўйнайди"

Айниқча, Асад ва Рустам Дўрмоновни кўпчилик яхши билади. Лекин уларнинг кенжаси Равшан Дўрмонов ҳам борлигини унутмаслик керак. Фаолиятини асосан ўзи туғилиб ўсган Сурхондарё футболига бағишлаган 45 ёшли мураббий ўз режалари билан ўртоқлашди.

"Айни пайтда Тошкентнинг "Интер" фахрийлар жамоаси сафида ўйнаяпман. Мураббий сифатида эса "Сурхон"ни бошқаряпман. Биз учун қувонарлиси шуки, келаси йил "Сурхон" биринчи лигада қатнашишни бошлайди. Вилоят раҳбарлари бу клубни яна қайта тиклашга киришганлар. Биласиз, бу жамоада ўйнаганман. Фаолиятимни энг яхши даврларини айнан "Сурхон"да ўтказганман. Шу боис бу жамоа мен учун жуда қадрли ҳисобланади.

Менинг бош мақсадим "Сурхон"ни олий лигага олиб чиқиш. Илгари миллий терма жамоада ҳам сурхондарёлик футболчилар бир нечтани ташкил этарди. Кейинчалик ўртада узилиш бўлди. Мана кўриб турибсизки, биздан ҳам иқтидорли ўйинчилар етишиб чиқмоқда. Биргина мисол қилиб Элдор Шомуродовни айтишим мумикн. Бу футболчининг келажаги порлоқ, - дейди Равшан Дўрмонов "Футбол Экспресс" газетасига берган интервьюси чоғида.