Расулжон Юлдашев: "Ҳоким кубогига Нигериядан жамоа таклиф қилинган эди"

Шу муносабат билан сайтимиз мухбири Бекзод Толибов Фарғона вилоят футбол Ассоциацияси биринчи вице-президенти Расулжон Юлдашев билан учрашиб, “Ҳоким кубоги” мусобақаси ҳақида интервью олди. Қуйида ушбу интервьюнинг тўлиқ матни билан танишишингиз мумкин.

Фарғона вилояти “Ҳоким кубоги” мусобақалари мана 25 йилдан ошибдики, анъанавий тарзда ҳар йили ўтказиб келинмоқда. Мазкур турнирнинг ташкил этилишига Фарғона вилоят ҳокимлиги томонидан катта амалий ёрдам кўрсатиб келинади. Турнир аллақачон халқаро мусобақа мақомини олиб улгурган. Лекин афсуски, бу йили қўшни Қирғизистон ва Тожикистон давлатларидан жамоалар келишмоқчи эди, айрим муаммолар туфайли келишолмади. Биласизми, Нигериядан жамоа таклиф қилинган эди. Лекин виза билан боғлиқ муаммо туфайли Нигерия давлатидан кутилган жамоа турнирга кела олмади. Лекин насиб қилса келаси йили кўплаб хорижий давлатлардан мазкур турнирга жамоаларни таклиф этиш ва иштирокини таъминлаш ниятимиз бор.

Айни дамда “Ҳоким кубоги” мусобақасида 18 та Суперлига, Про-Лига ва янги мавсумда Про-Лигада қатнашишни мақсад қилган жамоалар иштирок этишмоқда. Бундан ташқари мазкур мусобақада ўтказиладаган ўйинларни бошқариш учун Тошкент шаҳридан Суперлига ўйинларини бошқариб борадиган 35 нафар, қўшни Қирғизистон Республикасидан 4 нафар ҳакамлар жалб этилган ва уларга барча шароитлар яратиб берилди. Бу йилшҳги мусобақа 4 та стадионда ўтказилмоқда. Шу йили янгилик киритдик,мана Ёзёвон туманидаги “Марказий” ўйингоҳда мусобақа доирасидаги учрашувлар ўтказилмоқда. Кейинги йили вилоятимизнинг кўплаб туман ва шаҳарларида мазкур мусобақа доирасидаги учрашувларни ўтказиш ва иштирокчи  жамоалар сонини янада кўпайтириш режамизда бор. Айни дамда “Ҳоким кубоги” мусобақалари кўтаринки кайфиятда ўтмоқда.

Тақдирни қарангки, об-ҳаво мазкур мусобақа давом этаётган вақтда айнан футбол ўйнайдиган даражада бўлмоқда. Мазкур турнирнинг ташкил этилиши нима учун? Бу турнир ҳеч қайси футбол бўйича юқори турувчи ташкилот томонидан рўйхатга олинмаган. Бу турнир Фарғона ҳамда қўшни вилоят жамоаларига селекция ишлари ва жисмоний тайёргарлик учун қулайлик яратиб бериш учун ташкил этилади. Бу турнирда иштирок этишган жамоалар биринчи навбатда таклиф этилган футболчиларнинг салоҳияти, кўзлаб юрилган футболчиларнинг даражаси каби ҳолатларда маълумот олиш, шунгингдек миллий чемпионатларимизга тайёрларлик ишлари учун қулайлик яратиш учун ташкил этилади. Шунингдек футболчилар учрашувларда ўзларини тутишлари, учрашув ҳакамлари томонидан қўйиладиган талабларни бажаришлари учун ўзларида хулосалар чиқариш учун ташкил этилади. “Ҳоким кубоги”да иштирок этган футболчи футбол тартиб-қоидаларни тушунади ва миллий чемпионатларимизда мазкур хулосаларига асосан ўйнайди.

Агар об-ҳаво ноқулайлик туғдирмаса, турнирнинг финал учрашувини 9 февраль кунига ўтказишни режалаштирмоқдамиз. Албатта турнирда муносиб иштирок этган жамоаларни тақдирлаш, қимматбаҳо совғалар ва Фарғона вилоят ҳокимлиги, Фарғона вилоят футбол Ассоциацияси махсус дипломлари билан тақдирлаш режамизда бор. Тақдирлаш маросими ўша машҳур чемпионатлар каби даражада ташкил этилиши устида ишламоқдамиз. Бу борада Фарғона вилоят ҳокимлиги, Фарғона шаҳар ҳокимлиги ҳамда маданият бўлимлари билан хамкорликда иш олиб бормоқдамиз. Бу йилги тақдирлаш маросими албатта ўзгача даражада ташкил этилиши бўйича ишлаяпмиз.    

Бекзод Толибов ёзиб олди.