Расмий хабар. Шаҳзод Убайдуллаев - "Шахтёр" (Солигорск) футболчиси

Бу ҳақида "Металлург" клуби матбуот хизмати хабар бермоқда.

"Бекободнинг “Металлург” жамоаси ҳужумчиси ва тўпурари Шаҳзод Убайдуллаев бугун Беларусь чемпиони – “Шахтёр” клуби билан шартномани расмийлаштирди. 

Беларусь чемпионатида тўп сураётган ўзбекистонлик футболчилар сони яна бир нафарга ошди. «Металлург» клубининг 22 ёшли ҳужумчиси 8 январь санасида Беларусга учиб кетганди. Убайдуллаев бўлғуси клуби қароргоҳида тиббий кўрикдан ўтди. Кеча томонлар бир тўхтамга келишди ҳамда ўзаро  шартнома имзоланди. Эслатиб ўтамиз, ўтган йили мазкур клуб шарафини ўзбекистонлик бошқа бир ўйинчи Жасур Яхшибоев ҳам ҳимоя этганди.

Шаҳзод Убайдуллаев ўтган йили “Металлург” таркибида Суперлиганинг 26 ўйинида майдонга тушиб, 8 та гол урганди. Бундан ташқари Шаҳзод Убайдуллаев 2020 йилги мавсумдан эътиборан Ўзбекистон миллий терма жамоаси мураббийлари эътиборига тушди. МТЖнинг йиғинларига жалб этилди ва учта ўртоқлик учрашувида майдонга туширилди. Шаҳзод ўзининг Ўзбекистон МТЖ таркибидаги дебют учрашувидаёқ Тожикистон миллий терма жамоаси дарвозасини ишғол этганди.

Шаҳзод Убайдуллаевга “Металлург” таркибидаги самарали мавсум учун миннатдорчилик билдирамиз ва “Шахтёр” (Солигорск) таркибида Беларусь чемпионати ҳамда халқаро майдонларда омад ёр бўлишини тилаймиз",- деб ёзади клуб ўзининг расмий телеграм саҳифасида.