Қорақалпоғистонлик футзал мураббийлари учун ўқув курси

Ушбу курслар Ўзбекистон футбол федерациясининг болалар, ўсмирлар ва оммавий футбол бошқармаси ҳамда Ўзбекистон мини футбол (футзал) ассоциациясининг 2015 йилги иш режасига асосан бўлиб ўтди.

Ўз навбатида 21-26 июль кунлари Қорақалпоғистон  республикаси пойтахтидаги “Турон” спорт мажмуасининг ўқув-машғулот базасида олиб  борилган мазкур курс машғулотларига ОФК инструктори Аваз Мақсумов раҳбарлик қилди. Нукуслик Онгарбой Жалимов курс координатори вазифасини ўтади.  Деярли бир ҳафта мобайнида 16 нафар қорақалпоғистонлик мураббий “Level One” сертификати йўналишида сабоқ олишди.

- Футзал бўйича мураббийларимиз ушбу курс жараёнига жиддий ёндошишди, - дейди Қорақалпоғистон республикаси футбол федерацияси биринчи вице-президенти Владимир Назаров. – Негаки, кейинги вақтларда мураббийларнинг тегишли лицензия ва сертификатга эга бўлишлари муҳим аҳамият касб этаётир. Шу жиҳатдан, улар малакаларини ошириш, тажрибаларини янада юксалтириш борасида изланишаётир. Ишончим комилки, ниҳоясига етган навбатдаги курс республикамизда спортнинг футзал турини янада оммавийлашишига хизмат қилади.

Икром ХУДОЙБЕРГАНОВ.